Ўзбекистон ҳудудида ҳаво ҳароратининг кескин пасайиши, қор ёғиши сабабли Қамчиқ довонидаги вазият ҳақида Фавқулодда вазиятлар вазирлиги томонидан маълумот берилди.
Маълум қилинишича, Қамчиқ довонида Фавқулодда вазиятлар вазирлиги раҳбарлигида йўлларни қордан тозалаш ишлари олиб борилмоқда. Ушбу ишларга «Қамчиқ автойўл», «Ўзбекистон темир йўллари» компаниялари ва бошқа тузилмаларнинг махсус техникалари жалб қилинган. Ҳаракат хавфсизлиги Йўл ҳаракати хавфсизлиги хизмати ходимлари томонидан назорат қилинмоқда.
Таъкидланишича, довонда профилактик тадбирлар ҳам олиб борилмоқда, хусусан, йўллар музлашининг олдини олиш мақсадида махсус техникалар ёрдамида қум ва туз аралашмаси сепилмоқда. Довон бўйлаб олиб борилаётган ишларга 150 та махсус техника жалб қилинган.
«Ўзгидромет» маълумотларига кўра, қор ёғиши 19 ноябрнинг тонгига қадар давом этади. Йўллар хавфсиз ҳолатда, бироқ ушбу йўналиш бўйича ҳаракатланмоқчи бўлган ҳайдовчиларга барча хавфсизлик қоидаларига риоя қилиш тавсия этилади.
Изоҳ (0)