Нидерландия пандемиянинг иккинчи тўлқинида жорий қилинган чекловларни юмшата бошлади. Бу ҳақда мамлакат бош вазири Марк Рютте эълон қилди, деб ёзмоқда «РБК».
Мамлакат ҳукумати хабарига кўра, 19 ноябрдан бошлаб маданият соҳасидаги муассасалар ва ташкилотлар — кутубхоналар, театрлар, концерт майдонлари, музейлар, мусиқа мактабларини очишга рухсат берилди.
Бинолар ичида ташриф буюрувчилар ўртасида 1,5 метрли ижтимоий масофани сақлаш талаб этилади. Театрларда ёки кинотеатрларда битта оила аъзолари ёнма-ён ўтириши мумкин.
Шунингдек, фуқароларга кунига уч нафаргача меҳмонни уйда қабул қилишга рухсат берилади, 12 ёшгача бўлган болалар бундан мустасно. Бир оилага тегишли бўлмаган энг кўпи билан тўрт киши уйдан ташқарида бир жойда йиғилиши мумкин.
Ресторан ва кафелар, шу жумладан маданий муассасалардаги ёпиқ қолмоқда, аммо улар овқатни олиб кетиш учун тайёрлайди.
Ҳукумат баёнотида айтилишича, Нидерландияда коронавирус инфекцияси билан касалланиш ҳолатлари сони камаймоқда. Бироқ таъкидланишича, одамларнинг алоқалари ва ҳаракатланишини чеклашни давом эттириш керак.
Ўтган ҳафта давомида COVID-19 касаллиги аниқланган ҳолатлар сони бир ҳафта аввалгига нисбатан камайди. Ҳозирги вақтда мамлакатнинг 20 минтақаси энг юқори «оғир» хавф даражасига эга, бештасида — кейинги «жиддий» хавф даражаси амал қилмоқда. Пандемия бошланганидан бери мамлакатда 450 мингдан ортиқ одам коронавирус билан касалланган, 8,6 мингдан ортиғи вафот этган.
Октябрь ойининг ўртасида Нидерландия вирус туфайли киритилган чораларни кучайтирди, хусусан, уйда қабул қилинадиган меҳмонлар сони чекланди, агар имконият бўлса, фуқароларга уйда ишлаш буюрилди, овқатланиш нуқталари ёпилди ва кофе дўконларининг иши чекланди.
Ноябрь ойи бошида расмийлар икки ҳафта муддатга қўшимча чекловлар киритганди.
Мавзуга доир: Эрон COVID-19 туфайли чекловларни кучайтиради
Изоҳ (0)