АҚШ президенти Дональд Трамп Киберхавфсизлик ва инфратузилма хавфсизлиги агентлиги раҳбари Крис Кребсни ишдан олди. Бу ҳақда Трамп ўзининг Twitter’ида маълум қилган, деб хабар бермоқда Meduza.
The New York Times’нинг аниқлик киритишича, айнан Кребс Америка сайловлари хавфсизлиги учун масъул бўлган. У Трампнинг 2020 йил 3 ноябрдаги президентлик сайловларида қонунбузарликлар бўлганлиги ҳақидаги даъволарига бир неча бор қарши чиққан.
«Крис Кребснинг 2020 йилги сайловлар хавфсизлиги тўғрисида сўнгги баёноти ўта ноаниқ эди, чунки (аслида) жуда кўп қонунбузарлик ва сохталашишлар бўлган, кузатувчиларга сайлов участкаларига киришга рухсат берилмаган, овоз бериш машиналаридаги носозликлар Трампнинг овозларини Байденга берилган овозларга ўзгартирган», — дея унинг ишдан олинишига изоҳ берган Трамп.
Кребс, Трамп унинг ишдан олинганини маълум қилгандан сўнг, ўзининг Twitter’ида агентликда хизмат қилиш унинг учун шарафли бўлганини таъкидлаб, «Биз ҳаммасини тўғри қилдик», деб ёзган.
NYT маълумотларига кўра, Кребс ҳамкасбларига ноябрь ойида бўлиб ўтган сайловлардан сўнг, Трамп почта орқали овоз беришда қалбакилаштиришлар ҳақида эълон қилган пайтда, 2020 йил июнида уни ишдан бўшатилиш кутаётганини айтган.
Крис Киберхавфсизлик ва инфратузилма хавфсизлиги ташкил этилган 2018 йилдан буён унга раҳбарлик қилиб келган. NYT уни энг тез ривожланаётган федерал агентликлардан бири деб атайди. Агентлик электр станциялари ва сув таъминоти тизимлари хавфсизлиги билан ҳам шуғулланади.
АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади. У сайловлар қонунбузарликлар билан ўтган деган фикрда, шунингдек, сайловларда мамлакат Конституцияси бузилганини айтган.
Федерал прокуратура АҚШ президентлик сайловларида мавжуд қоидабузарликларга оид ҳеч қандай далил топмаганлигини айтиб, сайловлардаги қонунбузарликни текширишдан бош тортган.
Изоҳ (0)