Даниядаги фермаларда коронавирус билан касалланган барча қоракўзанлар ўлдирилди. Бунинг ортидан Дания қишлоқ хўжалиги вазири истеъфога чиқди

Даниядаги фермер хўжаликларида яшовчи коронавирус инфекциясига чалинган барча қоракўзанлар ўлдирилди. Бу ҳақда Дания Ветеринария ва озиқ-овқат бошқармасига таяниб, Meduza хабар берди.

Қоракўзанлар мамлакатдаги 1100 дан ортиқ фермер хўжаликларининг 284 тасида йўқ қилинган. Яна 25 фермер хўжалигидаги ҳайвонлар шубҳа остида турибди.

Ветеринария ва озиқ-овқат бошқармаси 23 октябрдан бошлаб касалланган қоракўзанларнинг қандай йўқ қилинганлигини кўрсатадиган инфографикани эълон қилди. График коронавирус билан касаллангани учун қоракўзанлар ўлдирилган фермер хўжаликлари сони ва қоракўзанлар ўлдириладиган фермер хўжаликлари сонини кўрсатади.

MINKFARME OG COVID-19 STATUS 18/11-20
Alle #COVID19dk smittede minkfarme er aflivet. Fødevarestyrelsen overvåger fortsat landets minkfarme for COVID-19:

➡️ 284 minkfarme er smittet med COVID-19. Heraf er 284 aflivet.
➡️ 25 minkfarme er under mistanke. pic.twitter.com/trMViVLSSP

— Fødevarestyrelsen (@Foedevare) November 18, 2020

4 ноябрь куни Дания ҳукумати ҳайвонларда коронавирус инфекциясини келтириб чиқарадиган SARS-CoV-2 вируси мутациясига учраганидан кейин мамлакатдаги барча фермер хўжаликларида қоракўзанлар йўқ қилинишини маълум қилди. Ушбу вирус штаммлари организмнинг коронавирусга қарши антитанани ишлаб чиқариш қобилиятини пасайтиради, бу эса келажакдаги вакциналар самарадорлигини назарий жиҳатдан пасайтириши мумкин.

10 ноябрь куни Дания ҳукумати фермерлардан касал ва соғлом ҳолатдаги барча қоракўзанларни ўлдиришни талаб қилиш учун қонуний асосга эга эмаслигини тан олди. Ҳукумат фақат касалланган фермаларда қоракўзанларни ўлдиришни талаб қилиши мумкинлигини айтди. Ўша куни Дания ҳукумати мамлакатдаги қоракўзанларни йўқ қилиш тўғрисидаги қарорини қўллаб-қувватловчи қонун лойиҳасини парламентга тақдим этди.

Даниядаги фермаларда коронавирус билан касалланган барча қоракўзанлар йўқ қилиниши ортидан мамлакат озиқ-овқат, қишлоқ хўжалиги ва балиқ хўжалиги вазири Могенс Йенсен ўз лавозимини тарк этишини эълон қилди. Аввалроқ, у баъзи фермер хўжаликларида ҳайвонларда коронавирус мутацияси аниқланганлиги сабабли мамлакатда етиштирилган қоракўзанларни йўқ қилиш тўғрисидаги қарор нотўғри бўлганлигини тан олганди.

«Бугун мен бош вазирга ҳукуматдан истеъфога чиқмоқчи эканлигимни айтдим. Мен парламентдаги партиялар орасида керакли ёрдамга эга эмасман деб айта оламан», — деб ёзган вазир Twitter’да.

Дания дунёдаги энг йирик қоракўзан мўйнаси етказиб берувчиси ҳисобланади. Ҳукуматнинг ҳайвонларни йўқ қилиш тўғрисидаги қароридан олдин Даниянинг барча фермер хўжаликлари турли хил ҳисоб-китобларга кўра, 12 дан 17 миллионтагача қоракўзан етиштирган.