Бугун,

  • USD 11014.01
  • RUB 191.8
  • EUR 10674.78

2019/2020-ўқув йилида АҚШдаги ўзбекистонлик талабалар сони 546 нафарни ташкил этди (ўтган йилга нисбатан 4,4 фоизга кам — 571). Ушбу маълумотлар ОpenDoors таълим соҳасида халқаро алмашинув тўғрисидаги ҳисоботда келтирилган. У АҚШ Давлат департаментининг Таълим ва маданият ишлари бюроси ва Халқаро таълим институти (IIE) томонидан нашр этилган, деб хабар беради «Gazeta.uz».

Фото: Саидазиз Аъзамов / «Дарё»

Фото: Саидазиз Аъзамов / «Дарё»

2020 йилги ОpenDoors ҳисоботига кўра, Қўшма Штатлардаги ўзбекистонлик талабаларнинг умумий сони 546 нафарни ташкил этади, уларнинг 50,5 фоизи бакалавриат даражасида, 31,5 фоизи магистратура босқичида, 11,5 фоизи ихтиёрий амалий машғулотларда ва 6,4 фоизи инглиз тили ёки қисқа муддатли ўқиш каби дастурларда қатнашмоқда. Бу Ўзбекистондаги талабалар орасида Америка таълимига бўлган қизиқишнинг ортиб бораётганлигини кўрсатади. «Америка олий ўқув юртлари ҳам ўзбекистонлик талабаларни жалб қилишга қизиқишни кучайтирмоқда», — дейилади хабарда.

АҚШ 2019/2020-ўқув йилида 1 миллиондан зиёд халқаро талаба (1 075 496) қабул қилган, бу кўрсаткич кетма-кет бешинчи йил давомида қайд этилди. 2019/2020-ўқув йилида Қўшма Штатлардаги чет эллик талабалар сони бир оз пасайишига (1,8 фоиз) қарамай, ушбу гуруҳ ҳали ҳам АҚШ олий ўқув юртлари талабаларининг 5,5 фоизини ташкил қилади. АҚШ Савдо вазирлиги маълумотларига кўра, халқаро талабалар 2019 йилда АҚШ иқтисодиётига 44 миллиард доллар ҳисса қўшган.

Пандемияга қадар АҚШ хорижлик талабалар учун энг асосий йўналишлардан бири бўлган. Янги хорижлик талабаларнинг қабул қилиниши барқарорлашган (-0,6 фоиз) ва ўтган икки йилда кузатилган 7 фоизли пасайишга қараганда сезиларли даражада яхшиланган.

АҚШдаги барча хорижлик талабаларнинг 53 фоизи Хитой ва Ҳиндистон ҳисобига тўғри келади (мос равишда 34,6 ва 18 фоиз). Талабалар энг кўп келадиган давлатлар ўнлигидан Жанубий Корея (4,6 фоиз), Саудия Арабистони (2,9 фоиз), Канада, Вьетнам, Тайван, Япония, Бразилия ва Мексика (2,4 фоиздан 1,3 фоизгача) ўрин олган.

Ҳисоботга кўра, 2018/2019 йилларда қарийб 347,1 минг америкалик хориж ОТМларида таҳсил олган. Бу бир йил олдинги кўрсаткичдан (341,7 минг) юқори.

ОpenDoors — бу АҚШ олий ўқув юртларида таҳсил олаётган халқаро талабалар ва чет элда ўзларининг АҚШдаги коллежлари ёки университетлари учун академик кредитларни олиш учун таҳсил олаётган америкалик талабалар тўғрисидаги кенг қамровли маълумот манбаи.

Эслатиб ўтамиз, 2014 йилда АҚШ ОТМларида 463 нафар ўзбекистонлик талаба таҳсил олган бўлса, 2015 йилда 491 кишига, 2018 йилда эса 570 кишига етганди.

Изоҳ
Асосий янгиликлар