Citigroup банки коронавирусга қарши вакциналар тарқалиб, жаҳон иқтисодиёти тикланган тақдирда доллар курси 20 фоизга тушиб кетишини прогноз қилмоқда, деб ёзади «Коммерсантъ».
Таҳлилчилар фикрича, вакцинация халқаро савдони жонлантиради. Экспертлар 2001 йилги тажрибадан хулоса чиқармоқда, ўшанда Хитойнинг Жаҳон савдо ташкилотига қўшилиши глобализацияга имконият яратган ва доллар шундан кейин бир неча йиллар давомида пасайиб борган эди.
Вакцина тарқалишидан ташқари, АҚШ Федерал захира тизимининг эҳтиёткорона сиёсати ҳам доллар курсига таъсир қилиши мумкин. Таҳлилчилар фикрича, дунёда вазият нормаллашганидан кейин инвесторлар бошқа бозорларга ўта бошлайди.
Citigroup валютанинг 1985 йилдан буён энг кескин тарзда пасайишини кутмоқда. Ўшанда долларнинг олти асосий валюта саватига нисбатан ҳисобга оладиган ДХЙ индекси 18,5 фоизга тушиб кетган эди. Долларнинг ўнта асосий валютага нисбатан динамикасини акс эттирувчи Bloomberg Dollar Spot Index март ойидан буён 11 фоизга пасайган.
Аввалроқ Хитой, Япония, Жанубий Корея, Австралия, Янги Зеландия ва АSEAN мамлакатлари Кенг кўламли минтақавий иқтисодий шериклик ҳақида битим имзолаган эди. Унинг ратификация қилиниши дунёдаги энг йирик эркин савдо зонаси яратилишига олиб келади.
Эслатиб ўтамиз, Moderna компанияси ўзининг коронавирусга қарши вакцинаси 94,5 фоиз самарадорлик кўрсатганини эълон қилганидан кейин АҚШ фонд бозорида кескин ўсиш кузатилди. Асосий биржа индексларидаги ўсишлар бир ҳафта олдин АҚШнинг бошқа бир компанияси Pfizer ва BioNTech компанияси томонидан яратилган вакцина 90 фоиз самарали эканлигини эълон қилинганидан кейин қайд этилган ўсишдан кўра пастроқ бўлган.
Изоҳ (0)