Олий Мажлис Қонунчилик палатасининг навбатдаги мажлисида давлат бюджети ва давлат мақсадли жамғармаларининг 2020 йилнинг 9 ойи давомидаги ижроси тўғрисида ахборот берилаётгани ҳақда хабар берилган эди.
«Gazeta.uz»нинг ёзишича, ҳисоботдан сўнг депутатлар томонидан мутасадди вакилларга саволлар берилди. Жумладан, Қонунчилик палатаси депутати Умид Жабборов ортиқча тўланган солиқ суммалари ва уни қайтариш масаласига эътибор қаратди.
«Ҳисоботда 2020 йил 1 октябрь ҳолатига, 126 миллиард сўм ортиқча тўланган солиқ суммалари келтирилди. Солиқ кодексига асосан, ортиқча тўланган солиқ суммаларига Марказий банкнинг тегишли қайта молиялаш ставкасидан келиб чиққан ҳолда фоизлар ҳисобланиши ва тўлаб берилиши белгилаб қўйилган. Савол: ортиқча тўловлар учун солиқ тўловчилар фойдасига қанча фоизлар ҳисобланган, қайси манбалардан ундириб берилган? Ўзи бу бўйича механизмлар ишлаб чиқилганми?», — дея мурожаат қилди депутат.
Давлат солиқ қўмитаси раиси Шерзод Кудбиев мазкур саволларга жавоб берар экан, бу Солиқ кодексининг 104−105-моддаларида аниқ белгилаб қўйилгани, ортиқча тўлов бўлса, қайта молиялаштириш ставкаси миқдорида қайтариб берилишини таъкидлади. У, шунингдек, ортиқча тўланган солиқ тадбиркорлик субъекти ўзи мурожаат қилса ёки суднинг қарори чиқса, қайтарилишини ҳам айтиб ўтди.
«Яқин кунларда Молия вазирлиги билан қайтариб бериш тартибини қабул қиламиз. Маълумот учун айтмоқчиман, 126 миллиард сўм йил бошида 167 миллиард бўлган. Тадбиркорлардан бизга тўлаб беринглар ёки олдиндан бюджетга тўлаб қўйинглар дейилгани ҳисобига эмас, балки солиқ тўловчининг ўзи ҳисобот даврига келиб, ойнинг бошида тўловни амалга оширгани учун ҳосил бўлган рақам. Умумий бир ойда 10 триллион солиқ тушумлари тушади, ортиқча тўланган 126 млрд сўм — ўтиш қолдиғи, бу нормал рақам ҳисобланади», — деган қўмита раиси.
«Бутун масъулиятни зиммамга олиб айтишим мумкинки, туман, вилоят даражасида ҳам инкасса жараёни тўлиқ автоматлаштирилган ва инсон омили чекланган. Тадбиркорлик субъектларида маблағни мажбурий ундириб олишга таъсир қилмайди, буни фақат қўмита юритади. Inkasсани қўйишга қўмитада ҳам битта менда ва масъул департамент директорида ваколат бор», — деди Шерзод Кудбиев.
Унинг қўшимча қилишича, тадбиркорлик субъектларининг айланма маблағларини солиқ органи раҳбарининг у ёки бу қарорига асосан олиб қўйиш мумкин эмас, олинган инкассани қайтариш имконияти ҳам мавжуд эмас.
Изоҳ (0)