Федерация Кенгаши (Сенат) Россия президентига 10 ноябрдан Тоғли Қорабоғга зарурий қуролланиш ва махсус техникаларга эга тинчликпарвар ҳарбий контингентни йўналтиришга рухсат берди.
Бу борадаги тегишли қарор 18 ноябрь куни бўлиб ўтган парламент юқори палатасининг 492-йиғилишида қабул қилинган. Уни овоз бериш жараёнларида иштирок этган 129 сенаторнинг барчаси қўллаб-қувватлади.
Россиялик тинчликпарварларни Тоғли Қорабоғга киритиш бўйича қарор 10 ноябрь куни Арманистон ва Озарбайжон ўртасидаги ўт очишни тўхтатиш бўйича имзоланган битим доирасида қабул қилинган. Россиялик ҳарбийларнинг дастлабки гуруҳлари Қорабоғга 10 ноябрнинг ўзида етиб борган.
Россия президенти қуролли кучлардан мамлакат ташқарисида фойдаланиши учун Федерация Кенгашидан рухсат олиши керак. Хусусан, 2014 йилнинг 1 мартида сенаторлар Владимир Путинга Россия қўшинларини Украина ҳудудига киритишга рухсат берган эди.
Аввалига Кремль Федерация Кенгашининг 2015 йил сентябрдаги қарори амалда бўлгани учун президентга тинчликпарварларни Қорабоғга киритиш учун қўшимча рухсат керакмаслигини айтганди. Федерация Кенгашининг Конституциявий қонунчилик ва давлат қурилиши қўмитаси раҳбари Андрей Клишаснинг маълум қилишича, Россия президенти Қорабоғга ҳарбийларни киритиш бўйича сенаторлардан барибир рухсат олишга қарор қилган, чунки тинчликпарварлар миссияси узоқ давом этадиган характерга эга.
Эслатиб ўтамиз, Арманистон, Озарбайжон ва Россия етакчилари 9 ноябрь куни кечқурун Қорабоғда жангларни тўхтатиш ҳақида уч томонлама шартнома имзолади. Сулҳ шартлари Келбажар, Агдам, Лачин туманлари ва Газах туманида Арманистон томони эгаллаб турган ҳудудлар Озарбайжон назорати остига берилишини назарда тутади.Баҳсли ҳудудга 2 мингга яқин Россия тинчликпарварлари киритилади, улар ўт очишни тўхтатиш режимига риоя қилинишини назорат қилади. Шунингдек, томонлар асирлар, марҳумларнинг жасадларини айирбошлашни бошлайди ва минтақада транспорт қатновини қайта тиклайди.
Изоҳ (0)