Pashinyan Qorabog‘dagi mojaro yakuni bo‘yicha “Yo‘l xaritasi”ni taklif etdi

Armaniston bosh vaziri Nikol Pashinyan Tog‘li Qorabog‘dagi tinchlik sulhidan so‘ng, o‘z hukumatining keyingi ishlariga oid rejani taqdim etdi. Siyosatchi 15 banddan iborat “Yo‘l xaritasi”ni Facebook’dagi sahifasida e’lon qilgan.

“Urushda yuzaga kelgan vaziyat, omadsizlik, urushdan keyingi holat bo‘yicha asosiy javobgar menman. Biroq, shuningdek, men ushbu muammoni yengib o‘tish va mamlakatda barqarorlik hamda xavfsizlikni o‘rnatishga ham bosh mas’ulman”, — deb yozadi Pashinyan.

Uning dasturidan quyidagi punktlar o‘rin olgan:

• YeXHTning Minsk guruhi formatida Qorabog‘ maqomi bo‘yicha muzokaralar jarayonini qayta tiklash;
• Tinch aholini qaytarish va Arsaxdagi vayron qilingan infratuzilmani qayta tiklash;
• Halok bo‘lganlar, jarohat olganlar va harbiy xizmatchilarining oilalariga ijtimoiy kafolatni taqdim etish;
• Armaniston Qurolli kuchlarini isloh qilish;
• Koronavirus pandemiyasini yengib o‘tish va iqtisodiy faollikni qayta tiklash;
• Partiyalar to‘g‘risidagi qonun va saylov kodeksiga o‘zgartirish kiritish.

Pashinyan ushbu maqsadlarga erishish uchun yarim yil kerak bo‘lishini aytgan va 2021-yilning iyunida “yo‘l xaritasi”ning bajarilgani to‘g‘risidagi hisobot berishni va’da qilgan.

Avvalroq Nikol Pashinyan Tog‘li Qorabog‘ atrofida yuzaga kelgan majburiyatlar uchun javobgar ekanligini ma’lum qilgandi. Uning fikricha, Tog‘li Qorabog‘dagi urushni tugatish uchun kelishuvni imzolashdan boshqa chora yo‘q edi. Pashinyanning aytishicha, Armaniston jangovar harakatlarni davom ettirganida, nafaqat Tog‘li Qorabog‘ poytaxti Stepanakertni, balki butun Tog‘li Qorabog‘ni qo‘ldan chiqargan, minglab harbiy xizmatchilar qurshovda qolib ketgan bo‘lardi.

Eslatib o‘tmiz, Rossiya ishtirokidagi muzokaralar natijasiga ko‘ra, nizo tomonlari o‘t ochishni to‘xtatishga qaror qildi. 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi. Hujjatga ko‘ra, Boku va Yerevan egallab turgan pozitsiyalarida to‘xtab, Tog‘li Qorabog‘ hududining bir qismi, shu jumladan, strategik jihatdan muhim Shusha shahri Ozarbayjonga o‘tadi. Shartlarda aytilishicha, Armaniston 20-noyabrgacha Agdam va Kalbajar tumanlarini, 1-dekabrga qadar Lachinni Ozarbayjonga qaytarishi kerak edi. Shuningdek, kelishuv mintaqaga Rossiya tinchlikparvar kuchlarini kiritishni nazarda tutadi. Nizoni tartibga solishda boshqa mamlakatlardan tinchlikparvar kuchlarning ishtirokini o‘sha vaqtda Moskva rad etgan edi.