Олий Мажлис Қонунчилик палатасининг 18 ноябрь куни ўтказилган навбатдаги мажлисида давлат бюджети ва давлат мақсадли жамғармаларининг 9 ойдаги ижроси кўриб чиқилди.
Йиғилишда, жумладан, Ўзбекистон мактабгача таълим вазири ўринбосари Мақсуд Йўлдошев давлат-хусусий шерикчилиги тўғрисидаги саволларга жавоб қайтарган. Шундан сўнг депутат Дониёр Ғаниев савол бераётган пайтда вазир ўринбосари микрофонни ўчиришни унутган.
Мақсуд Йўлдошев ўша пайтда қўнғироқ қилган Хуршид исмли шахсга жавоб берар экан, «Обқочишга мажбурмиз энди, нима қиламиз?», деган сўзлари тўғридан-тўғри эфирга кетган. Йўлдошев бунда, катта эҳтимол билан, депутатларнинг саволларига берган ўз жавобларини назарда тутган.
Олий Мажлис Қонунчилик палатаси депутати Расул Кушербаев вазир ўринбосарининг бу хатти-ҳаракатига шундай муносабат билдирган: «Мактабгача таълим вазири ўринбосари ўзи билмаган ҳолда иш тизими бўйича бор ҳақиқатни очиб қўйди: тизим олиб қочишга мослашган. Бугун депутатларни алдаб олиб қочинг, эртага Президентни алдаб олиб қочинг, кейин халқни олдаб олиб қочинг».
Эслатиб ўтамиз, 2017 йилда «Миллий тикланиш» демократик партияси депутати Дилфуза Жалилова «Ўзбекистон» телеканалининг «Муносабат» кўрсатувидаги мулоқот чоғида Вобкент туманидаги Чашмаи Айюб мақбарасида ҳеч қандай иш олиб бормагани тўғрисидаги саволга «Бор, бор, бор ролимиз» дея жавоб қайтариб, партиядоши томон бурилиб, кўз қисиб қўйгани тўғридан-тўғри эфирда кетиб қолган эди.
Изоҳ (0)