Ҳасан Кабиржонов Ўзбекистон Республикаси Президентининг 2020 йил 17 ноябрдаги буйруғи билан Бош прокуратура ҳузуридаги Мажбурий ижро бюросининг янги директори этиб тайинланди. У бунга қадар ушбу идоранинг директори вазифасини бажарувчи сифатида фаолият юритган.
Кабиржонов аввалроқ прокуратуранинг Иқтисодий жиноятларга қарши курашиш департаменти органлари, Фарғона вилояти ва республика маҳкамаси, сўнгра Марказий банкнинг турли тармоқларида ишлаган. 2018 йилдан МИБ директорининг биринчи ўринбосари лавозимида хизмат вазифасини олиб борган.
2020 йилнинг 10 октябрида МИБнинг собиқ раҳбари Ботир Қудратхўжаев Хоразм вилояти прокурори этиб тайинланганидан сўнг идоранинг директори вазифасини бажарувчи сифатида фаолият юритган.
Эслатиб ўтамиз, Ўзбекистон Президенти Шавкат Мирзиёев раислигида суд ҳужжатлари ижро этиш тизимини такомиллаштириш чора-тадбирлари юзасидан бўлиб ўтган видеоселекторда МИБ фаолияти алоҳида тилга олинган эди. Жумладан, 2020 йилнинг 10 ойида бюрога 4 миллионга яқин ижро ҳужжатлари келиб тушгани, шундан 1 миллион 200 мингтаси бажарилмагани қайд этилган. Бундан ташқари, йиғилишда қарздорликларни қисқартириш бўйича мамлакат даражасида алоҳида, вилоят ва туманлар миқёсида алоҳида тизимда иш олиб борилиши, хусусан, МИБ 20 миллиард сўмдан юқори қарзларни ундириш билан шуғулланиши белгиланди. Бюронинг вилоят бошқармалари 10 миллиард сўмдан 20 миллиард сўмгача бўлган қарзлар ундируви билан ишлаши, туман ва шаҳар бўлими бошлиқлари ҳокимлар ва сектор раҳбарлари билан бирга оғир аҳволга тушиб қолган қарздорларнинг манзилли рўйхатларини тузиб, уларга кўмаклашиши айтилди.
Изоҳ (0)