Миллий масс-медиани қўллаб-қувватлаш ва ривожлантириш жамоат фонди васийлик кенгаши раиси Комил Алламжонов Тошкент шаҳар ҳокими Жаҳонгир Ортиқхўжаевнинг ёшлар билан учрашувда волонтёрлар ҳақида айтган фикрига эътироз билдирди.
Инновацион ривожланиш вазирлигида бўлиб ўтган тадбирда чиқиш қилган пойтахт ҳокими волонтёрлар ҳақида гапирган. У айрим волонтёрлар фаолиятига шубҳа билан қарашини билдириб, уларнинг асл нияти бошқаларга ёрдам беришми ёки даромад олишми, қабилида савол қўйган ва уларнинг фаолиятини текшириш кераклигини таъкидлаган.
«Товар, пул олиш, Payme’дан пул ўтказиб бериш, кимгадир нимадир олиб бориб беришда волонтёрлар жуда кўпайиб кетди. Битта нарсани тўғри тушунинглар, мен сал шубҳага боряпман — бу волонтёрлик касбми ёки ҳақиқатан ёрдам беришми? Ёки бундан даромад олишми, фарқига боролмаяпман. Волонтёр кўнгилли ишчи дегани бўлса, лекин мен бирорта волонтёрни шу пайтгача бирор қариянинг оёғини ювгани ёки сочини тараб қўйганини кўрмадим», — деган Жаҳонгир Ортиқхўжаев.
Миллий масс-медиани қўллаб-қувватлаш ва ривожлантириш жамоат фонди васийлик кенгаши раиси Комил Алламжонов ҳоким Ортиқхўжаевнинг бу гапларига эътироз билдирган. Унинг ёзишича, Инновацион ривожланиш вазирлиги биносида ўтказилган учрашув «ёшларга мотивация эмас, қўлига бир урадиган тадбир» бўлган.
Тегилмаган шу волонтёрлар қолганди. Бу ёшларга мотивация эмас, қўлига бир урадиган тадбир бўлибди. Ваҳоланки, пандемия даврида барча ёшлар бирлашди, Тошкент шаҳрини ҳокимият эплолмай қолганида, айнан шу волонтёрлар ҳаётини хавф остига қўйиб, одамлар дардига малҳам бўлди.Ўша пайтда ёрдамга муҳтож бўлиб, уйда ётган айрим қарияларга оёғини тоғорага сув солиб, совун билан ювиш эмас, балки сумкада ташилган егуликлар керак эди. Энди уларни ўрганиш керакмиш. Улар даромад оляптими ёки кўнгилли ёрдамчиларми, шуни ўрганиш керакмиш.
Ўрганиш эмас, раҳмат дейиш керак. Ўрганиш керак бўлса, Тошкентда масала кўп.
Комил Алламжонов, Миллий масс-медиани қўллаб-қувватлаш ва ривожлантириш жамоат фонди васийлик кенгаши раиси
Изоҳ (0)