Ўзбекистонда бюджет маблағлари энг кўп қайси вилоятда асоссиз сарфлангани маълум бўлди

Олий Мажлис Қонунчилик палатаси депутатлари томонидан муҳокама қилинаётган 2020 йил 9 ойлик якунлари бўйича Давлат бюджети ва давлат мақсадли жамғармалари бюджетларининг ижроси тўғрисидаги ҳисоботда бюджет интизомининг бузилиши ҳолатлари қайд этилган.

Ҳисобот даврида ўтказилган назорат тадбирлари давомида 129,1 миллиард сўм бюджет ижросида камомад ва асоссиз харажатлар аниқлангани депутатлар томонидан кескин танқид қилинган.

Хусусан, пандемия билан боғлиқ мураккаб вазият бўлишига қарамай, соғлиқни сақлаш соҳасига ажратилган бюджет маблағларининг қарийб 22 миллиард сўми бемақсад сарфланган. Коронавирусга қарши курашиш учун жалб этилган тиббиёт муассасаларида Инқирозга қарши курашиш жамғармасидан ажратилган маблағларнинг 70,7 миллиард сўми қоидаларга амал қилмаган ҳолда, сарфлаб юборилган.

Мактабгача таълим вазирлиги тизимида 10 миллиард, Уй-жой коммунал хизмат кўрсатиш вазирлиги тизимида 6,3 миллиард, Сув хўжалиги тизимида 4 миллиард сўм миқдорида молиявий қонунбузилиш ҳолатларига йўл қўйилган.

«Kun.uz»нинг ёзишича, бюджет интизомининг бузилиш ҳолатлари борасида Қашқадарё ва Андижон вилоятлари «етакчилик қилмоқда». Қуйидаги рўйхатда қайси вилоятда қанча бюджет маблағлари асоссиз ишлатилгани келтирилган.

• Қашқадарёда – 14,1 миллиард сўм;
• Андижонда – 12,8 миллиард сўм;
• Фарғонада – 11,1 миллиард сўм;
• Сурхондарёда – 10,6 миллиард сўм;
• Наманганда – 9,9 миллиард сўм;
• Жиззахда – 9,8 миллиард сўм;
• Самарқандда – 9,2 миллиард сўм;
• Тошкент вилоятида – 6,5 миллиард сўм;
• Хоразмда – 4,2 миллиард сўм;
• Тошкент шаҳрида – 9,8 миллиард сўм;
• Қорақалпоғистон Республикасида – 6,1 миллиард сўм.

Бухоро вилоятида соғликни сақлаш тизимидаги 12 та тиббиёт муассасаларида тез тиббий ёрдам ходимларига бюджетдан ва ҳомийлар ҳисобидан берилган бир марталик моддий ёрдам пулларининг ҳисоблаб тўланишида ходимларнинг ишлаётган ўрин бирликларига нисбатан моддий ёрдам пулларининг нотўғри ҳисоблаб тўланиши оқибатида жами 1 миллиард 108,4 миллион сўм бюджет маблағи асоссиз сарфланган.

Жиззах вилояти Ғаллаорол туман ҳалқ таълим бўлимида 2020 йил январь—апрель ойларида лавозим маошларига 472,3 миллион сўм мукофот ва моддий ёрдам пуллари асоссиз қўшиб тўланган.

Аввалроқ Ўзбекистонда 2020 йилда бюджет прогнозини бажариш учун тадбиркорлардан 823 миллиард сўм ортиқча солиқ ундирилгани маълум бўлганди.