Арманистон президенти Пашинян маҳкамасини истеъфога чиқаришга ва янги сайловлар ўтказишга чақирди

Арманистон президенти Армен Саркисян навбатдан ташқари парламент сайловларини ўтказишга ва Никол Пашиняннинг вазирлар маҳкамасини истеъфога юборишга чақирди, деб ёзади «РБК».

«Охирги бир неча кун давомида мен парламент ва парламент ташқарисидаги кучлар, турли ноҳукумат ташкилотлар ва алоҳида шахслар билан ўнлаб сиёсий маслаҳатлашувлар олиб бордим. Мажлис иштирокчиларининг мутлақ кўпчилиги битта масала бўйича бир фикрда: бош вазирнинг Конституцияга мувофиқ истеъфога чиқарилиши зарурлиги ва муддатидан олдинги парламент сайловлари», — деди Саркисян халққа мурожаатида.

Унинг сўзларига кўра, мамлакатда парламентга муддатидан олдин сайловлар ўтказилиши муқаррар. Ҳукумат истеъфоси ва янги муддатидан олдинги сайловлар оралиғидаги даврда мамлакатни миллий розилик ҳукумати бошқариши керак, деб ҳисоблайди Саркисян.

Аввалроқ Саркисян Гадрут аҳолиси билан учрашувда унинг «бой дипломатик ва музокаравий тажрибаси» Қорабоғ бўйича қарор қабул қилишда қўлланилмаганига афсус билдирган эди. Саркисян Арманистон бош вазири ҳамда Россия ва Озарбайжон президентлари томонидан имзоланган ўт очишни тўхтатиш ҳақидаги баёнотга ҳеч қандай алоқаси бўлмаганини таъкидлади.

Шунингдек, Саркисян музокаралар жараёнини ЕХҲТнинг Минск гуруҳи форматига қайтариш биринчи қадамлардан бири бўлиши кераклигини айтди.

Эслатиб ўтамиз, Россия, Арманистон ва Озарбайжон раҳбарларининг баёноти ҳақида эълон қилинган куни Саркисян ҳужжат у билан муҳокама қилинмаганини айтганди.

«Россия ва Озарбайжон президентлари томонидан урушни тўхтатиш бўйича битим имзоланганини матбуот орқали билдим. Шунингдек, айнан матбуот орқали урушни тўхтатиш шартларидан хабар топдим», — деган эди у.

Аввалроқ Арманистон ташқи ишлар вазири Зограб Мнацаканян истеъфога чиққани хабар берилган эди.

Арманистонда 10 ноябрдан бери Тоғли Қорабоғдаги урушни тугатиш тўғрисидаги битим имзолангани сабабли сиёсий инқироз давом этмоқда. Ушбу келишув шартларига кўра, Озарбайжон тан олинмаган республиканинг катта ҳудудларини ўз назорати остига олди. Ереванда Никол Пашиняннинг истеъфосини талаб қиладиган оммавий митинглар ўтказилмоқда.