Аласка Airlines авиакомпаниясига тегишли Boeing 737-700 самолёти Якутат шаҳридаги аэропортга қўниш вақтида қўнғир айиқни уриб юборди, деб хабар беради CNN.
Экипаж қўниш вақтида учиш-қўниш йўлагини кесиб ўтаётган иккита йиртқични пайқаган. Учувчилар айиқларни самолёт остидаги йўлакни кесиб ўта оладиган тарзда ўтказиб юборган, бироқ шундан сўнг капитан ҳаво кемасининг чап бортида зарба сезган. Айиқнинг жасади учиш-қўниш йўлаги марказидан бир неча метр наридан топилган.
Самолёт бортида экипаж аъзоларидан ташқари яна олти йўловчи бўлган, уларнинг ҳеч бирига жароҳат етмаган. Boeing’нинг чап двигателига шикаст етган.
Штатнинг транспорт департаменти матбуот хизмати вакилининг сўзларига кўра, бу Аляскада самолёт уриб юборган биринчи айиқ бўлиши мумкин. Бунга қадар ҳаво кемалари қушлар ва бошқа ҳайвонлар билан тўқнашган.
CNN’нинг ёзишича, 1987 йилда Boeing 737-200 Alaska Airlines учиш вақтида балиқ билан тўқнашиб кетган. У учувчилар кабинаси устидан учиб ўтган бургутнинг чангалидан тушиб кетган.
Эслатиб ўтамиз, 2018 йилда Москва—Афина рейсидаги йўловчи самолёти Шереметево аэропортида одам уриб юборган эди. Кейинроқ ҳалок бўлган шахс Испаниядан депорт қилинган ва Москва орқали Ереванга йўл олиши лозим бўлган 25 яшар Арманистон фуқароси бўлгани аниқланган.
Изоҳ (0)