Халқаро пресс-клубнинг 14 ноябрь кунги сессиясида Қашқадарё вилояти ҳокими Зоир Мирзаев вилоятда олимлар билан ўзаро ҳамкорлик йўқлигини таъкидлаб, Дон ва дуккакли экинлар илмий-тадқиқот институтининг Қашқадарё филиали фаолиятига қисқача тўхталиб ўтган. Бу ҳақда «Дарё» мухбири хабар бермоқда.
«2020 йил оғир бўлишига қарамай, Қашқадарёда илк бор қарийб 31 минг гектар майдонга мош экдик. Бу камида 46-47 минг тонна ҳосил дегани. Бизга йиллар давомида ёпиқ бўлган Ҳиндистон ва Хитой бозори мош учун Ўзбекистонга биринчи маротаба очилди, бунинг қадрига етишимиз керак. Мош учун муаммо йўқ бу йил.
Шуни айтиш керакки, вилоятда олиб борилаётган ишларимизнинг ҳаммаси рисоладагидек кўринади. Аммо тагида илм, илмий ёндашув ва олимлар билан ҳамкорлик йўқ. Бизда ҳаттоки, Дон ва дуккакли экинлар илмий-тадқиқот институтининг Қашқадарё филиали мавжуд. Лекин ким у билан ҳамкорлик қиляпти, деган саволга жавоб топиш қийин. Институт нима учун ташкил қилинган? Нишон туманига бориб, бу ерда олма яхши ҳосил беради ёки узум, мош яхши бўлади, дея ер ажратиб, маслаҳат бериши ва кўрсатиши керак эмасми?
Битта Чироқчининг ўзида 7400 гектар интенсив боғ ташкил қилиш учун Туркияга шартнома учун катта миқдорда пул тўлаб бердик. Туркиянинг 2 нафар агрономи уч ярим ой юриб, бизга қаерга нима экишимизни айтиб берди», — деди вилоят раҳбари.
Мавзуга доир:
Изоҳ (0)