Янгиҳаёт тумани Халқ депутатлари Кенгашининг навбатдан ташқари сессияси 16 ноябрь куни бўлиб ўтди, дея хабар бермоқда Тошкент шаҳар ҳокимлиги.
Сессияда Янгиҳаёт тумани ҳокимини тасдиқлаш тўғрисидаги масала кўриб чиқилди. Депутатлар томонидан ушбу лавозимга тавсия этилган Ҳаёт Иноғомов номзоди бир овоздан маъқулланди.
Ҳаёт Иноғомов 1986 йилда Тошкент шаҳрида туғилган. 2008 йилда Тошкент автомобиль йўллари институтини тамомлаган.
Шу пайтга қадар Тошкент шаҳар ҳокимининг ўринбосари – Тошкент шаҳар каналлардан фойдаланиш ва уларга туташ ҳудудларни ободонлаштириш бошқармаси бошлиғи вазифасида ишлаган. Ҳаёт Иноғомовни ушбу туманга ҳоким этиб тайинлашни Шавкат Мирзиёев таклиф қилган эди.
Янгиҳаёт тумани Халқ депутатлари Кенгашининг навбатдан ташқари сессиясида туман прокурори ва Ички ишлар бўлими бошлиғини тасдиқлаш масаласи ҳам кўриб чиқилди.
Янгиҳаёт тумани прокурори лавозимига Азамат Азимов, Ички ишлар бўлими бошлиғи лавозимига эса Мурод Раимов тасдиқланди.
Маълумот учун, Президент Шавкат Мирзиёевнинг 2020 йил 11 ноябрь кунги ПҚ-4888-сон қарори билан Тошкент шаҳри таркибида Янгиҳаёт тумани ҳокимлиги ташкил этилди. Туман майдони пойтахт ва Тошкент вилоятидаги 6 туман ҳудуди ҳисобига кенгайтирилган.
Изоҳ (0)