Zoir Mirzayev: “Olib borilayotgan ishlarimizning tagida ilmiy yondashuv va olimlar bilan hamkorlik yo‘q”

Xalqaro press-klubning 14-noyabr kungi sessiyasida Qashqadaryo viloyati hokimi Zoir Mirzayev viloyatda olimlar bilan o‘zaro hamkorlik yo‘qligini ta’kidlab, Don va dukkakli ekinlar ilmiy-tadqiqot institutining Qashqadaryo filiali faoliyatiga qisqacha to‘xtalib o‘tgan. Bu haqda “Daryo” muxbiri xabar bermoqda.

“2020-yil og‘ir bo‘lishiga qaramay, Qashqadaryoda ilk bor qariyb 31 ming gektar maydonga mosh ekdik. Bu kamida 46-47 ming tonna hosil degani. Bizga yillar davomida yopiq bo‘lgan Hindiston va Xitoy bozori mosh uchun O‘zbekistonga birinchi marotaba ochildi, buning qadriga yetishimiz kerak. Mosh uchun muammo yo‘q bu yil.

Shuni aytish kerakki, viloyatda olib borilayotgan ishlarimizning hammasi risoladagidek ko‘rinadi. Ammo tagida ilm, ilmiy yondashuv va olimlar bilan hamkorlik yo‘q. Bizda hattoki, Don va dukkakli ekinlar ilmiy-tadqiqot institutining Qashqadaryo filiali mavjud. Lekin kim u bilan hamkorlik qilyapti, degan savolga javob topish qiyin. Institut nima uchun tashkil qilingan? Nishon tumaniga borib, bu yerda olma yaxshi hosil beradi yoki uzum, mosh yaxshi bo‘ladi, deya yer ajratib, maslahat berishi va ko‘rsatishi kerak emasmi?

Bitta Chiroqchining o‘zida 7400 gektar intensiv bog‘ tashkil qilish uchun Turkiyaga shartnoma uchun katta miqdorda pul to‘lab berdik. Turkiyaning 2 nafar agronomi uch yarim oy yurib, bizga qayerga nima ekishimizni aytib berdi”, — dedi viloyat rahbari.