Австрия канцлери Себастьян Курц 17 ноябрдан мамлакатда коронавирус тарқалишини тўхтатиш учун янги локдаун жорий этилишини эълон қилди, деб ёзади Meduza. Чекловлар камида 6 декабргача амал қилади.
Австрия аҳолисига уйда қолиш мажбурияти юклатилди, улар фақат фавқулодда вазиятларда, масалан, озиқ-овқат сотиб олиш ёки ишга бориш учун кўчага чиқиши мумкин. Бунгача фуқароларнинг фақат 20:00 дан 6:00 гача уйдан чиқиши тақиқланган эди. Шунингдек, ҳукумат одамларнинг кун давомида ўз оиласидан ташқари, фақат битта одам билан учрашишига рухсат бериш орқали, мулоқотларни чеклади.
Дўконларнинг катта қисми ёпилади, фақат дорихоналар, шунингдек, озиқ-овқат ва маиший кимё билан савдо қиладиган дўконлар очиқ қолади. Ҳукумат ресторан ва кафелар фаолиятига қўйилган чекловларни ҳам узайтирди. Бундан ташқари, Австрияда мактаблар ёпилади — ўқувчилар масофавий таълимга ўтади.
Себастьян Курц Австрия аҳолисини яқин бир-икки ҳафта ҳеч ким билан учрашмай туришга чақирди. Унинг таъкидлашича, локдаун — коронавирусга қарши курашда «иш берувчи ягона восита».
12 ва 13 ноябрь кунлари пандемия бошидан буён биринчи марта Австрияда бир кунда COVID-19’га чалиниш бўйича 9 мингдан ортиқ ҳолат қайд этилди. Сўнгги бир кеча-кундузда, 14 ноябрь куни эрталабки маълумотларга кўра, 7063 кишида вирус аниқланган.
Австрияда жами 198 мингдан зиёд одамда касаллик аниқланган. 119 мингдан кўпи соғайган, яна 1746 киши вафот этган.
Изоҳ (0)