Санъат оламида энг нуфузли мукофот ҳисобланган «93-Оскар» тақдирлаш маросимининг «Энг яхши халқаро бадиий фильм» номинациясига Ўзбекистон номидан «Ўзбеккино» Миллий агентлиги буюртмасига биноан суратга олинган фильмлар – Жаҳонгир Қосимовнинг «Ибрат», Аюб Шахобиддиновнинг «Рангсиз тушлар» ва Ёлқин Тўйчиевнинг «Фариданинг икки минг қўшиғи» фильмларидан бири илгари сурилиши кутилмоқда. Бу ҳақда «Ўзбеккино» Миллий агентлиги aхборот хизмати хабар берди.
Шунингдек, Ўзбекистон Оскар қўмитаси 2021 йилнинг 25 апрель куни Лос-Анжелес шаҳрининг машҳур Dolby театрида бўлиб ўтадиган энг нуфузли маросим танловида иштирок этиши учун муносиб номзод бўйича сўнгги қарорини 2020 йилнинг 20 ноябрь куни эълон қилади. Шунингдек, Ўзбекистон Оскар қўмитаси янги таркибдаги аъзоларини тасдиқлади. Қўмита раиси этиб «Ўзбеккино» Миллий агентлиги бош директори Фирдавс Абдуҳолиқов тайинланди.
Қўмита аъзолари таркибидан Зулфиқор Мусоқов, Матёқуб Матчонов, Баҳодир Одилов, Ҳамидулла Ҳасанов, Элжон Аббасов, Нигора Каримова, Жаҳонгир Аҳмедов, Манноп Қўчқоров, Азиз Арзиқулов, Умид Ҳамдамов, Бахтиёр Ёқубов, Фарруҳ Тўлаганов, Элдор Юлдашев, Игор Пинхасов ҳамда продюсер ва Қўмита координатори Ойбек Абдушукуров ўрин олган.
Оскар регламентига мувофиқ мукофотга номзод фильмларга тақдимот бўлгунга қадар телевидение ва интернет тармоғида намойиш этилмаган бўлиши талаб қилинади.
Эслатиб ўтамиз, 2019 йил баҳорида «Ўзбеккино» Миллий агентлиги, Ўзбекистон ёшлар иттифоқи ва Ўзбекистон миллий кинокомиссияси ташаббуси билан Ўзбекистон Оскар қўмитаси ташкил қилиниб, АҚШ киноакадемияси томонидан рўйхатдан ўтказилган. Илк бор Умид Ҳамдамовнинг «Иссиқ нон» фильми Ўзбекистон номидан нуфузли мукофотга илгари сурилган эди.
Изоҳ (0)