Турк киноижодкорлари мухлислар зерикиб қолмаслиги учун тинимсиз ҳаракатда. Буни кети узилмай тақдим қилинаётган, бир-биридан қизиқ сюжетга эга сериаллардан ҳам билса бўлади
«Ҳужумчи»
Драма жанридаги ушбу сериал туркча суперқаҳрамон ҳақида ҳикоя қилади. Шукру Ўзйилдир гавдалантирган бош қаҳрамон мактаб ўқитувчиси бўлади ва қаҳрамон бўлиш хаёлига ҳам келмайди. Ҳаётини ўқитувчиликка бағишлашни истаган Фотиҳ тўғри ва адолатли инсон экани сабаб истиқомат қиладиган шаҳридаги ноҳақликларга: давлат ташкилотларининг бепарволиги ва полиция ходимларининг сотилиб кетганига чидай олмайди. Шундан кейин у шаҳар ҳимоясига отланади ва кундузи устоз сифатида дарс бериб тунда кўчаларни босқинчилардан тозалайди. Фотиҳнинг ушбу танлаган позицияси шахсий ҳаётига ҳам таъсир қилмай қолмайди, у кўнгилдагидек қизни учратади. Бушра йигитни ноҳақликларга қарши курашишда қўллаб-қувватлайди.
«Гуноҳни ювиш»
Ёзувчи Зулфу Ливанелининг «Константинопол меҳмонхонаси» китоби асосида суратга олинган драма жанридаги сериалда Нургул Яшилчой ижросидаги қаҳрамон Зейнепнинг бир вақтлар йўл қўйган хатоси кейинчалик ҳаётини буткул изидан чиқариб юборади. У қадрдон ерини тарк этишига тўғри келади ва орадан 20 йил ўтиб гуноҳини ювиш учун қайтиб келади. Бу вақтда у кучли, мустақил, ўзини ҳимоя қила оладиган ва хатоларини тўғрилаб, уни азоб чекишга сабабчи бўлганларни кунини кўрсатадиган аёл бўлган бўлади.
«Яхши оила бошлиғи»
Комедия жанридаги ушбу сериалда ота ва бола муносабатларига асосланган воқеалар ривожини кўриш мумкин. Сюжетга кўра, ҳар куни оила аъзолари турли қийинчиликларга дуч келади ва уларни ҳал қилишига тўғри келади, аммо катта ва кичикларнинг муаммоларни ҳал қилиш борасидаги қарашлари фарқ қилади. Шунга қарамасдан, умумий ечим ва қарор қилишни уддасидан чиқади. Асосийси эса уларнинг барчаси ҳаётдан мамнунлик ва позитивликни йўқотмайди.
«Сўнгги ёз»
Романтик ва драма жанрларини ўзида мужассам этган мазкур сериалда икки ёш тўсатдан учрашиб, бир кўришда бир-бирини севиб қолади. Уларнинг ҳар иккиси ҳам ёш бўлишига қарамай, муносабатларига жиддий ёндашади ва биринчи қадамни қилишдан чўчийди. Севги ўти аланга олиб бўлганида эса ажралишига тўғри келади. Кейин эса турли қийинчилик ва муаммоларга қарамай ҳаракат қилишига тўғри келади. Алперен Дуймаз, Хафсанур Санжактутан сериалда бош қаҳрамон ролини ижро қилади.
«Менинг чап тарафим»
Мелис Живелек сценарий муаллифи бўлган мазкур сериал молиявий инқирозга учраганидан кейин оилавий аҳволи ёмонлашгани сабаб онаси билан бирга бўлишга мажбур бўлган қиз ҳақида. Авваллари исталган нарсани ўзига раво кўриши мумкин бўлган, Туркиянинг энг олди йигитлари эътиборида бўлган қизнинг шоҳона ҳаёт тарзи буткул ўзгаради. Ночор аҳвол, оддий уйда яшашига тўғри келган қиз ҳаётига бой оиланинг фарзанди бўлган йигит кириб келганидан кейин воқеалар ривожи кутилмаган тарзда давом этади. Бош ролларни Ўзге Ягиз, Толга Менди ва Жемре Байсел ижро қилади.
«Бир онанинг гуноҳи»
Драма жанридаги ушбу сериал машҳур филиппин сериали «Қайси даражада» сериалининг ремейки ҳисобланади. Жиддий юрак хасталиги безовта қиладиган ўғлининг ҳаётини сақлаб қолиш учун қилинадиган операцияга пул топиш учун ёлғиз она қотиллик қилишига тўғри келади. Ўғли тирик қолади, аммо у бир умр гуноҳкор бўлиб қолади. Бу ҳам етмагандек, ўғли у ўлдирган инсоннинг қизини яхши кўриб қолади. Бош ролларни Ўзге Ўзберк, Мерт Язиджиўглу ва Симай Барлос ижро қилади.
Изоҳ (0)