Forbes вафот этган энг бой машҳурларнинг йиллик рўйхатини эълон қилди. Баскетболчи Коби Брайант олтинчи ўринни эгаллади

Forbes журнали мероси ўлимидан кейин даромад келтиришни давом эттираётган таниқли шахсларнинг йиллик рейтингини эълон қилди. Биринчи ўрин яна бир бор Майкл Жексонга насиб этди. 2009 йилда вафот этган қўшиқчининг ижодий ҳуқуқлари унинг меросхўрларига 48 миллион доллар олиб келди. Бу ҳақда Meduza хабар берди.

Иккинчи ўриндан болалар китоблари муаллифи, 1991 йилда вафот этган доктор Сьюз (ҳақиқий исми — Теодор Зойс Гайзель) ўрин олган. Унинг китобларининг, шу жумладан «Гринч — Рождество ўғриси»нинг муаллифлик ҳуқуқи эгалари 33 миллион доллар даромад олган.

Снупи итини ва унинг дўстларини яратган энг бой марҳум рассом Чарльз Шульц учинчи қатордан жой олган (у 2000 йилда вафот этган). Унинг ўлимдан кейинги даромади йил давомида 32,5 миллион долларни ташкил этади.

2020 йилнинг январида вертолёт ҳалокатида вафот этган америкалик баскетболчи Коби Брайант ушбу рўйхатга биринчи марта киритилди. У олтинчи ўринни эгаллади. Nike’нинг баскетболчи номи билан чиқарилган тўпламининг сотилиши ва Брайант таржимаи ҳолининг қўшимча нашри баскетболчининг меросхўрларига 20 миллион доллар даромад келтирди.

Эслатиб ўтамиз, америкалик афсонавий баскетболчи Коби Брайант авиаҳалокат натижасида 2020 йил 26 январь куни вафот этганди. Бортида 41 ёшли Брайант бўлган вертолёт Калифорнияда ҳалокатга учраган.