Хитойнинг талабига биноан Гонконг парламентидаги мухолифат депутатлари ишдан четлатилди. Буюк Британия ва АҚШ Хитойга санкциялар билан таҳдид қилмоқда

АҚШ Давлат департаменти 12 ноябрь куни Хитой ҳукуматининг Гонконг парламентидаги тўрт нафар мухолифат депутатини четлатиш тўғрисидаги қарорини қоралади. Бир кун олдин Оқ уй Хитойга янги санкциялар билан таҳдид қилган. Гонконг мухолифати Пекиннинг хатти-ҳаракатлари «битта мамлакат, иккита тизим» концепциясига чек қўяди, деб ҳисоблайди. Бу ҳақда Meduza хабар берди.

Бутунхитой халқ конгресси 11 ноябрь куни Гонконг депутатларини «ватанпарварлик қарашларига» риоя қилишга мажбурловчи резолюция қабул қилди. Депутатлар содиқлик қасамёдини бузмасликлари, Хитойнинг Гонконг устидан суверенитетига қарши чиқишлари ёки яқинда қабул қилинган миллий хавфсизлик ҳақидаги қонунларини танқид қилишлари керак эмас. Акс ҳолда, ижро этувчи ҳокимият судга мурожаат қилмасдан дарҳол уларни мандатларидан маҳрум қилишга ҳақлидир.

Қарор қабул қилингандан сўнг Гонконг раҳбари Кэрри Лам дарҳол мухолифат демократик блокининг тўрт нафар депутатни четлатди. 2020 йилнинг ёзида улар «ватанпарварлик етишмаслиги»да айбланган ва шу сабабли улар сентябрь ойида бўлиб ўтиши керак бўлган сайловга номзод сифатида рўйхатга олинмаган. Коронавирус туфайли овоз бериш бир йилга қолдирилди, шу сабабли улар ўз мандатларини сақлаб қолганди.

12 ноябрь куни қолган 15 нафар мухолифат депутати (Гонконг парламентида жами 70 та ўрин мавжуд) ўз норозилигини билдирган ҳолда истеъфога чиқишини эълон қилди. Шундай қилиб, Гонконг ўз тарихида биринчи марта демократик партиялар вакилисиз қолди.

South China Morning Post газетасининг таъкидлашича, шаҳар парламентида ваколатисиз қолган демократик мухолифат округ қонун чиқарувчи органларидаги ишларга эътибор қаратади: 2019 йилги сайловда Хитойга топшириш тўғрисидаги қонун лойиҳасига қарши кенг миқёсли норозилик намойишлари фонида демократлар жами 452 та ўриндан 392 тасини қўлга киритган. Округ депутатлари иш бошлаганида Хитойга содиқлик қасамёдини ичмайди, шунинг учун уларни янги қонунга биноан олиб лавозимдан четлатиш мумкин эмас.

Буюк Британия Ташқи ишлар вазирлиги Пекинни Гонконг Хитойга топширилганда имзоланган Хитой—Британия қўшма декларациясини бузганликда айблади. Ташқи ишлар вазири Доминик Рааб Пекинга санкциялар билан таҳдид қилди ҳамда Буюк Британия халқаро шериклар билан биргаликда Хитойнинг Гонконг автономиясини сақлаб қолиш бўйича ўз мажбуриятларини бажаришига эришишини таъкидлади. Хитойнинг Буюк Британиядаги элчиси Ташқи ишлар вазирлигига чақирилди.