Россия президенти маъмурияти АҚШ Демократик партиясидан президентликка номзод Жо Байденнинг вакиллари билан алоқада бўлмаган. Бу ҳақда Россия президентининг матбуот котиби Дмитрий Песков маълум қилди, деб хабар бермоқда «РБК».
Кремль АҚШдаги сайловдан кейин Байденнинг жамоаси билан алоқага чиққан-чиқмагани ҳақидаги саволга жавобан Песков: «Йўқ, алоқа бўлмаган», — деди.
Президент матбуот котиби сайловларнинг расмий натижалари эълон қилингандан сўнг Владимир Путин АҚШнинг янги президентига табрик телеграммасини юборишини айтди.
«Агар биз тўғри тушунган бўлсак, сайланган президент ҳали эълон қилинмаган», — деб қўшимча қилди Песков.
Аввалроқ Хитой Ташқи ишлар вазирлиги вакили Ван Венбин Жо Байден ва Камала Харрисни президентлик сайловидаги ғалабаси билан табриклаган эди. «Биз Америка халқининг танловини ҳурмат қиламиз ва жаноб Байден ва Харрис хонимни табриклаймиз», — деди у. Шунингдек, Туркия президенти Ражаб Тоййиб Эрдўғон ва БМТ бош котиби Антониу Гутерриш, Жанубий Корея президенти Мун Чже Ин Жо Байденни АҚШ президентлиги сайловидаги ғалаба билан табриклаган эди. Дмитрий Песков аввалроқ ҳам Путин «сайлов натижалари расман эълон қилинганидан кейин» Байденни табриклашини билдирган.
АҚШдаги президентлик сайловида берилган овозларни ҳисоблаш ҳали якунланмаган ва ғолиб расман эълон қилинмаган.
ОАВ маълумотларига кўра, ҳозирги пайтда Байден жамоавий сайловчиларнинг 290 та овозига эгалик қилмоқда. Трамп эса 217 та овоз олган. Яна 31 та овоз Шимолий Каролина ва Жоржия штатида ўз эгасини кутмоқда.
Изоҳ (0)