Нидерландиялик афсонавий ҳужумчи Денис Бергкампнинг аэрофобия, яъни самолётда учишдан қўрқишини кўпчилик яхши билса керак. Аҳвол шу даражага етиб борадики, кунлардан бир кун у бошқа ҳеч қачон самолётда учмасликка қарор қилади ва шу сабабли кўплаб сафар учрашувларини ўтказиб юборди.
Бироқ бу унинг муваффақиятларига жуда катта таъсир ўтказмайди, балки ушбу хусусияти уни яна-да машҳур қилиб юборди. Ҳатто унга «учмас голланд» деб лақаб беришганди.
Бергкамп футбол оламида турли хил фобиялардан азият чекадиган ягона инсон эмас. Қуйида эса айнан мана шундай қизиқарли ва ғайриоддий фобияларга эга бўлган чарм тўп усталари ҳақида фикр юритилади.
Питер Крауч – кемирувчилардан қўрқиш
Икки метрли инглиз ҳужумчиси фаолиятининг энг яхши йилларида дарвозабонлар учун ҳақиқий даҳшатнинг ўзгинаси эди. Крауч болалигидан кемирувчилардан ўлгудек қўрққан. Бу ҳақида айнан уларни уйда сақлашни яхши кўрадиган футболчининг рафиқаси ёзғириб гапирганди.
Бундан ташқари, Крауч фаолиятининг бошида ўз бўйининг ўсишидан қўрққан. Англияликнинг бўйи 2 метрдан ўтганидан кейин, у яна-да ўсиб кетишидан жиддий хавотирлана бошлаган.
Марко Вератти ва Фил Жонс – клаустрофобия
Ер юзидаги кўп одамлар, лифтда қамалиб қолишдан қўрқади, уларнинг орасида эса ПСЖ юлдузи Марко Верратти ҳамда «Манчестер Юнайтед» футболчиси Фил Жонсни ҳам учратиш мумкин. Шу туфайли, футболчилар имкон қадар чет элда лифтдан фойдаланмасликка ҳаракат қилади.
Андрей Аршавин – неофобия
Россиялик собиқ ҳужумчи янги ва ўзига бегона бўлган жой ҳамда шароитларга тушиб қолишдан (неофобия) қўрққан. Шу туфайли Аршавининг «Арсенал»га мослашиши жуда қийин кечган ва ҳатто руҳшуносга мурожаат қилишга ҳам мажбур бўлган.
Роналдо – ўз вазни ошиб кетишидан қўрқиш
Бразилиялик «сўйлоқ» фаолиятининг охирларига борибгина вазн билан боғлиқ муаммолар дуч келган бўлса-да, у ёшлигидан семириб кетишдан қўрққан.
«Интер»да ўйнаган вақтларида жамоанинг ўша пайтдаги мураббийи Эктор Купер футболчилардан режимга риоя қилишни талаб қилиб, жисмоний тайёргарликка ўта жиддий ёндашган ва футболчилардан ҳар куни вазн ўлчашни сўраган. Бу эса Роналдуни даҳшатга солган, чунки у қанча вазнга эканлигини билишни хоҳламаган.
Криштиану Роналду – ўлимдан қўрқиш
Роналду ҳаётда ҳамма нарсадан ҳам кўра кўпроқ ўлимдан қўрқади. Португалияликнинг сўзларига кўра, у 80 ёки 90 ёшга киришни хоҳлайди. Бундан кам эмас.
Роналдунинг максималист эканини ҳисобга олиб, бу баёнотдан ажабланишга ҳожат йўқ. Ахир, ҳужумчи футболчилик фаолиятини ҳам камида 40 ёшга қадар давом эттирмоқчи-ку.
Стивен Жеррард – мизофобия
«Ливерпуль»нинг буюк ва қўрқмас сардори ҳеч қачон қийинчиликлардан ва ҳатто энг даҳшатли рақиблардан чўчимаган, у ўзининг жасорати ҳамда фидойилиги билан ҳар доим жамоадошларига ўрнак бўлган.
Бироқ у сайёрадаги энг митти жонзотлар микробларга тоқат қила олмаган. Жеррард тозаликни жуда яхши кўради ва «ифлос қўллар» фобиясидан азият чекади, яъни мизофобиядан. Миш-мишларга кўра, баъзида у кунига йигирма марталаб қўлларини ювар экан. Шундан келиб чиқиб, пандемия шароитида унга осон бўлмаётгани аниқ.
Мавзуга доир: Жеррард, Пеле, Роналду. Футбол тарихида ортиқча баҳо бериб юборилган футболчилар рейтинги тузилди
Руни ухлаётган вақтида сукунатни ёмон кўради. Болалигида инглиз арвоҳ ва шарпалардан жуда қўрқарди, шунинг учун уларни қўрқитиш учун у нафақат чироқларни ўчирмас, балки телевизор ёки чангютгични ҳам ёқиб қўярди.
Электр жиҳозларининг товушлари остида ухлаш одати Рунида шу кунгача сақланиб қолган. Агар форвард меҳмонхонада тунаш учун ёлғиз қолса, соч қуритадиган (фен) мосламани ёқиб қўяди.
Килиан Мбаппе – сичқонлардан қўрқиш
ПСЖ форварди сичқонлардан ўлгудек қўрқади ва бу кичик махлуқлар билан қандай курашишни ҳам билмайди.
Бир сафар у Франция ёшлар терма жамоаси жойлашган меҳмонхонада сичқонга кўзи тушиб қолади ва дарҳол у ердан туёғини шиқиллатади ҳамда «воқеа жойи»га қайтиб келмасликка қарор қилади. Ушбу муаммони ҳал қилиш учун меҳмонхона ишчилари ҳатто мушук излашни бошлаб юборган экан.
Мавзуга доир: «Олтин тўп», Зидан ва французча Мадрид. Килиан Мбаппе нима учун «Реал»га ўтиши кераклиги ҳақида
Барча машҳур футболчилар орасида айнан Бекҳэмни ҳақли равишда фобияларнинг ҳақиқий «қироли» деб ҳисоблаш мумкин. Боиси инглизнинг қўрқувлар бир нечта.
Улардан биринчиси италиялик дарвозабонга (Жанлуижи Буффон) ҳеч қандай алоқаси бўлмаган, қурбақалардан қўрқиш, яъни буффонофобия. Бундан ташқари, футболчи қушлардан ҳам қўрқади.
Унинг уйида эса ҳар доим шунчаки тартиб, тозалик ва симметрия бўлиши керак. Бу бўлмаса, у ўзини ноқулай ҳис қилади.
Изоҳ (0)