Салоҳ, Мане ва Фирминодан иборат ҳужум учлигини парчалаган «Ливерпуль»нинг янги қаҳрамони Диогу Жота ҳақида

Диогу Жота – бутун футбол жамоатчилиги гапираётган «Ливерпуль»нинг янги юлдузи. Жота қандайдир 7-8 ўйин ичида нималарга қодир эканлигини исботлади ва кўп йиллик Салоҳ, Мане ва Фирминодан ташкил топган ҳужум триосини парчалай олди. Хўш, ким ўзи у «супермен»? Қуйида у ҳақида батафсил.

Жота «Ливерпуль»га келгач:

• Премьер Лиганинг 5 та ўйинида 3 та гол урди.

• «Ливерпуль» сафида Чемпионлар Лигасидаги иккинчи ўйинда гол урди ва учинчисида ҳет-трик қайд этди.

• Еврокубоклар доирасидаги 8 та ўйинда 3 та ҳет-трик («Вулверҳэмптон»даги ўйини ҳам ҳисобга олинган).

• «Ливерпуль» сафида кетма-кет 4 та ўйинда гол урди.

• «Ливерпуль» тарихидаги 10000-голга муаллифлик қилди.

Жота 2020 йилнинг ёзида «Ливерпуль»га қўшилганди, бироқ у ушбу қисқа муддат ичида Клоппнинг ўйинига осонликча сингиб кета олди. Ҳозирча Жота жамоанинг ушбу куздаги энг ёрқин ўйинчиси бўлиб турибди.

«Ливерпуль» Жота учун 45 миллион евро тўлади. У ҳақида нималар маълум?

«Ливерпуль» Жотанинг фаолиятидаги иккинчи топ-клуб ҳисобланади. Биринчиси «Атлетико» эди. У Мадрид клубига Португалиянинг «Пассуш де Феррейра» клубидан келганди, бироқ у «матрасчилар» сафида икки йил ичида бирорта ҳам учрашув ўтказмаган. Бу вақт оралиғида эса у дастлаб «Порту», кейинчалик «Вулверҳэмптон»да тўп сурди.

Жотанинг «Вулверҳэмптон»га ўтиши ҳеч кимни ажаблантирмаса керак. Боиси Жотанинг агенти Жорже Мендеш «бўрилар» ҳали Чемпионшипда ҳаракат қилиб юрган вақтдаёқ у ерга португалияликларни жойлаштиришни бошлаб юборганди.

Жотанинг «Вулверҳэмптон»га ўтиши «Порту»да жуда катта тортишувларга сабаб бўлган. Чунки улар Жотани яна бир мавсумга ижарага олиб, кейин сотиб олишни режалаштиришганди. Трансфердан сўнг ҳатто Порту президенти Жотага: «Нима бало қиляпсан? Ахир, сен бизда ўйнашингиз керак эди», — деб хабар жўнатган экан.

Диогу бўш вақтларида Football Manager симуляторини ўйнашни яхши кўради. Шунингдек, унинг қизиқишларидан яна бири теннисдир. Футболдан бўш вақтларида айнан ушбу спорт тури билан банд бўлишни афзал билади.

Жота ўта формал кийимларни хушламайди. «Порту»нинг костюм ишлаб чиқарадиган компания билан шартномаси бўлиб, унга кўра, клуб футболчилари Чемпионлар Лигаси ўйинларига костюмларда ташриф буюриши шарт бўлган. Жота эса бунга кескин қаршилик билдирган кам сонли футболчилардан бири бўлган. Ҳатто у бир сафар барчага қарши бориб, учрашувга спорт кийимида келган.

Жота ҳозирда «Ливерпуль»да ўйнайди, бироқ у бир неча йил аввал клубнинг ҳамшаҳари «Эвертон»ни яхши кўришини айтганди. «Менга ушбу жамоанинг ўйини ёқади. Мен уларни томоша қилишни яхши кўраман. Бир вақтлар улар ажойиб эди». Табиийки, Жота «қизиллар» сафига қўшилгач, бу «Эвертон» мухлислари учун айни муддао бўлиб хизмат қилди.

Жота Салоҳ, Мане, Фирмино триосига барҳам берадиганга ўхшайди...

Ҳозирда Роберто Фирмино билан тушунарсиз ҳолат юз бермоқда. У деярли ярим йилдан бери энг яхши формасидан жуда йироқда. Паст самарадорлик ва узоқ давом этган голсиз сериялар (у 23 июлда 479 деганда илк бор «Энфилд»да гол урди). Аслини олганда шунинг учун ҳам Жота сотиб олинганди.

Фирмино турғунликни бошдан ўтказаётган вақтда, Жота ўз имкониятидан аъло даражада фойдаланмоқда. «Ливерпуль» тизимидаги бир неча ой ичида у 6 та гол урди. Фирмино эса 2020 йил бошидан бери атиги 5 та.

Шулардан келиб чиқиб, ҳозирда кўпчилик Жотанинг узоқ вақт давомида ҳеч қандай босимни ҳис қилмаган ҳужум триосини парчалаганига ишонишни бошлаб юборди.

«Ливерпуль» собиқ футболчиси (ҳозирда BBC эксперти Дэнни Мёрфи) ҳам худди шундай фикрда:

«Жота – Юрген Клопп учун муаммо. Илгари унинг ҳужум учлиги учун танлови аниқ эди. Ҳозир у жамоага фойда келтириши учун бу ҳақида кўпроқ ўйлаши керак. Бу ёқимли ташвиш».

Мёрфининг фикрини жуда кўплаб журналистлар қўллаб-қувватламоқда. Улардан бири The Atheletic нашри колумнисти Жеймс Пирсдир. Қуйида унинг матнидаги асосий нуқталар келтирилади:

– Жота аллақачон «Ливерпуль»га катта таъсир кўрсатиб бўлди. Бунга «Аякс»га қарши ўйинни мисол келтириш мумкин. У иккинчи бўлим ўрталарида, учрашувдаги ягона гол аллақачон урилган пайтда чиқди. Аммо у ўзининг прессинги билан ўйинни ўзгартира олди.

– Клопп одамлар унинг «Ливерпуль»ида ҳужумчилар танлови аниқ эканлиги ҳақида гапиришини ёқтирмайди. Жота эса ҳужум чизиғига ранг-баранглик бағишлашда ёрдам беради, мавсум узоқ, ўйинлар эса бисёр.

– Роберто (Фирмино) энг яхши формасида эмас, аммо Клопп ундан мамнун. У Фирминони тўпурар сифатида эмас, балки бутун ҳужумкор ўйин унга асосланган тотал футболчи сифатида кўрмоқда.

– Жота ниҳоятда кўп қиррали бўлиб, у аллақачон ҳужум маркази ва ўнг қанотида ўйнашга улгурган. Жота майдонга тушса, Фирмино унинг соясида қолиб кетмоқда. Аммо кейинги учрашувларда «Ливерпуль» майдонда ҳар иккала футболчи билан ҳаракатланиш эҳтимоли ҳам мавжуд.

Клопп Жота ҳақида қандай фикрда?

«Биз Диогу билан шартнома имзолаш учун кураш олиб бордик. Уни ишонтириш учун узоқ вақт кетмади. У – жуда истеъдодли футболчи. Унда тезкорлик, куч ва техника бор, Жота ҳар иккала оёғида бир хил ўйнай олади. У мен ўйлаганимдан анча яхшироқ экан, бу эса ҳақиқатан ёқимли».