Saloh, Mane va Firminodan iborat hujum uchligini parchalagan “Liverpul”ning yangi qahramoni Diogu Jota haqida

Diogu Jota – butun futbol jamoatchiligi gapirayotgan “Liverpul”ning yangi yulduzi. Jota qandaydir 7-8 o‘yin ichida nimalarga qodir ekanligini isbotladi va ko‘p yillik Saloh, Mane va Firminodan tashkil topgan hujum triosini parchalay oldi. Xo‘sh, kim o‘zi u “supermen”? Quyida u haqida batafsil.

Jota “Liverpul”ga kelgach:

• Premyer Liganing 5 ta o‘yinida 3 ta gol urdi.

• “Liverpul” safida Chempionlar Ligasidagi ikkinchi o‘yinda gol urdi va uchinchisida het-trik qayd etdi.

• Yevrokuboklar doirasidagi 8 ta o‘yinda 3 ta het-trik (“Vulverhempton”dagi o‘yini ham hisobga olingan).

• “Liverpul” safida ketma-ket 4 ta o‘yinda gol urdi.

• “Liverpul” tarixidagi 10000-golga mualliflik qildi.

Jota 2020-yilning yozida “Liverpul”ga qo‘shilgandi, biroq u ushbu qisqa muddat ichida Kloppning o‘yiniga osonlikcha singib keta oldi. Hozircha Jota jamoaning ushbu kuzdagi eng yorqin o‘yinchisi bo‘lib turibdi.

“Liverpul” Jota uchun 45 million yevro to‘ladi. U haqida nimalar ma’lum?

“Liverpul” Jotaning faoliyatidagi ikkinchi top-klub hisoblanadi. Birinchisi “Atletiko” edi. U Madrid klubiga Portugaliyaning “Passush de Ferreyra” klubidan kelgandi, biroq u “matraschilar” safida ikki yil ichida birorta ham uchrashuv o‘tkazmagan. Bu vaqt oralig‘ida esa u dastlab “Portu”, keyinchalik “Vulverhempton”da to‘p surdi.

Jotaning “Vulverhempton”ga o‘tishi hech kimni ajablantirmasa kerak. Boisi Jotaning agenti Jorje Mendesh “bo‘rilar” hali Chempionshipda harakat qilib yurgan vaqtdayoq u yerga portugaliyaliklarni joylashtirishni boshlab yuborgandi.

Jotaning “Vulverhempton”ga o‘tishi “Portu”da juda katta tortishuvlarga sabab bo‘lgan. Chunki ular Jotani yana bir mavsumga ijaraga olib, keyin sotib olishni rejalashtirishgandi. Transferdan so‘ng hatto Portu prezidenti Jotaga: “Nima balo qilyapsan? Axir, sen bizda o‘ynashingiz kerak edi”, — deb xabar jo‘natgan ekan.

Diogu bo‘sh vaqtlarida Football Manager simulyatorini o‘ynashni yaxshi ko‘radi. Shuningdek, uning qiziqishlaridan yana biri tennisdir. Futboldan bo‘sh vaqtlarida aynan ushbu sport turi bilan band bo‘lishni afzal biladi.

Jota o‘ta formal kiyimlarni xushlamaydi. “Portu”ning kostyum ishlab chiqaradigan kompaniya bilan shartnomasi bo‘lib, unga ko‘ra, klub futbolchilari Chempionlar Ligasi o‘yinlariga kostyumlarda tashrif buyurishi shart bo‘lgan. Jota esa bunga keskin qarshilik bildirgan kam sonli futbolchilardan biri bo‘lgan. Hatto u bir safar barchaga qarshi borib, uchrashuvga sport kiyimida kelgan.

Jota hozirda “Liverpul”da o‘ynaydi, biroq u bir necha yil avval klubning hamshahari “Everton”ni yaxshi ko‘rishini aytgandi. “Menga ushbu jamoaning o‘yini yoqadi. Men ularni tomosha qilishni yaxshi ko‘raman. Bir vaqtlar ular ajoyib edi”. Tabiiyki, Jota “qizillar” safiga qo‘shilgach, bu “Everton” muxlislari uchun ayni muddao bo‘lib xizmat qildi.

Jota Saloh, Mane, Firmino triosiga barham beradiganga o‘xshaydi...

Hozirda Roberto Firmino bilan tushunarsiz holat yuz bermoqda. U deyarli yarim yildan beri eng yaxshi formasidan juda yiroqda. Past samaradorlik va uzoq davom etgan golsiz seriyalar (u 23-iyulda 479 deganda ilk bor “Enfild”da gol urdi). Aslini olganda shuning uchun ham Jota sotib olingandi.

Firmino turg‘unlikni boshdan o‘tkazayotgan vaqtda, Jota o‘z imkoniyatidan a’lo darajada foydalanmoqda. “Liverpul” tizimidagi bir necha oy ichida u 6 ta gol urdi. Firmino esa 2020-yil boshidan beri atigi 5 ta.

Shulardan kelib chiqib, hozirda ko‘pchilik Jotaning uzoq vaqt davomida hech qanday bosimni his qilmagan hujum triosini parchalaganiga ishonishni boshlab yubordi.

“Liverpul” sobiq futbolchisi (hozirda BBC eksperti Denni Myorfi) ham xuddi shunday fikrda:

“Jota – Yurgen Klopp uchun muammo. Ilgari uning hujum uchligi uchun tanlovi aniq edi. Hozir u jamoaga foyda keltirishi uchun bu haqida ko‘proq o‘ylashi kerak. Bu yoqimli tashvish”.

Myorfining fikrini juda ko‘plab jurnalistlar qo‘llab-quvvatlamoqda. Ulardan biri The Atheletic nashri kolumnisti Jeyms Pirsdir. Quyida uning matnidagi asosiy nuqtalar keltiriladi:

– Jota allaqachon “Liverpul”ga katta ta’sir ko‘rsatib bo‘ldi. Bunga “Ayaks”ga qarshi o‘yinni misol keltirish mumkin. U ikkinchi bo‘lim o‘rtalarida, uchrashuvdagi yagona gol allaqachon urilgan paytda chiqdi. Ammo u o‘zining pressingi bilan o‘yinni o‘zgartira oldi.

– Klopp odamlar uning “Liverpul”ida hujumchilar tanlovi aniq ekanligi haqida gapirishini yoqtirmaydi. Jota esa hujum chizig‘iga rang-baranglik bag‘ishlashda yordam beradi, mavsum uzoq, o‘yinlar esa bisyor.

– Roberto (Firmino) eng yaxshi formasida emas, ammo Klopp undan mamnun. U Firminoni to‘purar sifatida emas, balki butun hujumkor o‘yin unga asoslangan total futbolchi sifatida ko‘rmoqda.

– Jota nihoyatda ko‘p qirrali bo‘lib, u allaqachon hujum markazi va o‘ng qanotida o‘ynashga ulgurgan. Jota maydonga tushsa, Firmino uning soyasida qolib ketmoqda. Ammo keyingi uchrashuvlarda “Liverpul” maydonda har ikkala futbolchi bilan harakatlanish ehtimoli ham mavjud.

Klopp Jota haqida qanday fikrda?

“Biz Diogu bilan shartnoma imzolash uchun kurash olib bordik. Uni ishontirish uchun uzoq vaqt ketmadi. U – juda iste’dodli futbolchi. Unda tezkorlik, kuch va texnika bor, Jota har ikkala oyog‘ida bir xil o‘ynay oladi. U men o‘ylaganimdan ancha yaxshiroq ekan, bu esa haqiqatan yoqimli”.