O‘tgan haftada “Barselona” prezidenti Xosep Bartomeu rasman iste’foga chiqdi. Hozirda esa klub va Lionel Messi o‘z vazifasini yaxshiroq bajara oladigan yangi rahbarni kutmoqda.

Haddan tashqari ko‘p xatolarga yo‘l qo‘yadigan (ayniqsa, transfer ishlarida) Bartomeuning ketishi nafaqat Messi va uning sheriklari, balki muxlislarni ham birdek xushnud etgani bor gap. Shunday ekan, ularning e’tiboriga Bartomeuning qimmatga tushgan xatolarini havola etishning ayni vaqti. Demak, quyida sarflangan pullarni umuman oqlay olma(yot)gan futbolchilar haqida fikr yuritiladi.

Jeremi Matye – 20 million yevro

Foto: “Barselona”

“Barsa” o‘sha yozda Mark-Andre ter Shtegen va Luis Suares bilan shartnoma imzolaganini hisobga olinsa, ko‘pchilik Jeremi Matye haqida unutib qo‘ygandi, ammo himoyachi kimsan Karles Puyol va Erik Abidalning o‘rnini egallashi kerak edi.

To‘g‘ri, jamoaning ashaddiy muxlislari uning “El-Klasiko”dagi golini yaxshi eslashi mumkin (boisi muxlislar bunday o‘yinlarda urilgan gollarni unutmaydi), biroq fransiyalik futbolchi boshqa hech narsasi bilan yodda qolmadi. Oxir-oqibat, u shunchaki “Barselona”ni erkin agent sifatida tark etdi.

Lyuka Din – 16,5 million yevro

Foto: Google Photos

Lyuka Din g‘oya bo‘yicha Xordi Alba bilan raqobatlashishi kerak edi, biroq u ikki mavsumda bor-yo‘g‘i 46- arta maydonga tushdi. Bu vaqt ichida esa Albani raqobatda yengish imkonsiz ish edi. Skautlar adashgani va futbolchida potensial yo‘qligi ko‘rinib turardi.

Biroq eng alam qiladigan joyi, transfer o‘zini oqlamagani emas, balki futbolchining hozirga kelib, “Everton”da kuchli futbolchiga aylanayotganidir. U 2018-yilda 18 million funt evaziga katalon klubini tark etgan.

Tomas Vermalen – 18 million yevro

Foto: “Barselona”

Abadiy jarohatga moyil futbolchi Tomas Vermalen “Arsenal”dagi beshta muvaffaqiyatli mavsumdan so‘ng “Barsa”ga o‘tgandi. Uning jamoada asosiy markaziy himoyachi bo‘lishi kutilgandi, biroq muntazam jarohatlar unga sira tinchlik bermasdi.

O‘zining katalon klubidagi birinchi mavsumida belgiyalik maydonga bir marta tushdi, bu ham shartnoma imzolaganidan bir yil o‘tib amalga oshgandi. Natijada, u asosiy tarkibga kira olmadi, hozirga kelib, Vermalen Yaponiyaning “Vissel Kobe” klubi sharafini himoya qilmoqda.

Andre Gomesh – 35 million yevro

Foto: La Liga

Din bilan bir vaqtda imzolangan Andre Gomesh muxlislarda katta umid uyg‘otgandi. Yarim himoyachi “Valensiya”da shu qadar yaxshi harakat qilardiki, hech kim Bartomeuning u uchun 35 million ajratganiga qarshilik qilmagandi.

Dastlab Gomesh talab qilingan o‘yinni ko‘rsatdi, ammo keyinchalik u umuman samarali harakat qilmay qo‘ydi va mavsum oxiriga kelib La Ligadagi eng yomon transfer deb topildi. Natijada u ham “Everton”ga sotib yuborildi.

Martin Breytueyt – 18 million yevro

Foto: Sportbox

Breytueytning transferi eng yomoni emas, balki Bartomeu davrini ochib tashlagan bitim bo‘lib xizmat qildi. Usmon Dembelening jarohatidan so‘ng (u haqida keyinroq) “Barselona”ga transfer oynasi yopilgandan so‘ng ham hujumchi sotib olishga ruxsat berildi. Shu tariqa Martin Breytueyt Kataloniyada paydo bo‘lib qoldi.

“Leganes” esa “Barselona”ning tovon puli miqdoridan hayratda edi. Breytueyt “Barsa”da 11 uchrashuv o‘tkazib, 1 ta gol urdi, yetakchisiz qolgan “Leganes” esa Segundaga tushib ketdi.

 Malkom – 41 million yevro

Foto: Google Photos

Dastavval Malkom “Roma” bilan kelishuvga erishgandi, hatto rimlik muxlislar uni kutib olish uchun aeroportga ham yig‘ilgandi. Biroq so‘nggi pallada “Barselona” braziliyalikni “bo‘rilar”dan “tortib” oladi. Rim klubi esa bu harakatni jinoyat deb ataydi. Biroq bu yerda boshqa muammo bor edi: “Barselona”ning o‘sha paytdagi murabbiyi Ernesto Valverde Malkomga unchalik qiziqmagandi. Valverde hatto klub uni sotib olmoqchi ekanligini ham bilmagan.

Natijada, Malkom 15 ta o‘yin o‘tkazib, shundan so‘ng “Zenit” safiga yo‘l oldi.

Antuan Grizmann – 120 million yevro

Foto: Getty Images

Fransiyalik futbolchining hali o‘z iste’dodini isbotlash uchun vaqt bor, ammo uning birinchi mavsumi to‘laligicha muvaffaqiyatsiz o‘tdi. “Sosyedad” va “Atletiko” sobiq o‘yinchisi jamoaning o‘yin uslubiga umuman to‘g‘ri kelmayapti. Antuan “Atletiko”da har doim hujumchi bo‘lgan, ammo 4-3-3 sxemasida u o‘zini xuddi begonalardek his qilmoqda.

Usmon Dembele – 105 million yevro

Foto: Google Images

Usmon Dembele “Barselona”ga o‘tganidan keyin tarixdagi ikkinchi eng qimmat o‘yinchiga aylangandi va u yerda Neymarning o‘rnini egallashi kerak edi.

Ammo Dembele o‘zining debyutidayoq jarohat olib, to‘rt oyga safdan chiqadi. Afsuski, bu faqat boshlanish edi. Ikkinchi mavsumda fransuz bir qancha o‘yinlar o‘tkazdi, ammo baribir unga barqarorlik yetishmasdi. “Billur oyoq” sohibi deb nom olgan Dembele ketma-ket jarohat olishda davom etaverdi. So‘nggi xabarlarga ko‘ra, jamoa qishda u bilan xayrlashish niyatida.

Arda Turan – 34 million yevro

Foto: Eurosport

2015-yilda “Barselona”ga transfer taqiqi qo‘yilgandi, shu bois yozda xarid qilingan Arda Turan yanvargacha maydonga tusha olmasdi. Biroq uzoq kutilgan imkoniyatdan turkiyalik futbolchi foydalana olmadi.

Muxlislar Turanni uning maydondagi harakatlari tufayli emas, balki klubning ko‘plab turkiyalik homiylarini xursand qilish uchun imzolangan deb hisoblashdi.

Valverde jamoa bilan ishlay boshlagach, Turan uning rejalariga kiritilmaganligini aniq qilib aytdi. Shuningdek, jurnalist va muxlislar ham uni tinch qo‘ymadi. Oxir-oqibat, Arda 2018-yilda Kataloniya tomonlardan bosh olib ketdi: dastlab “Istanbul”, keyinchalik esa “Galatasaroy”ga ko‘chib o‘tdi.

Filippe Koutinyo – 120  million yevro

Foto: Getty Images

Agar Dembele Neymarning o‘rnini bosa olmagan bo‘lsa, balki Koutinyo buning uddasidan chiqar? Shu maqsadda Koutinyo 120 million yevro evaziga “Liverpul”dan xarid qilindi. Biroq “qizillar” sobiq yulduzi Kataloniyaga kelishi bilan futbol o‘ynashni tom ma’noda unutib qo‘yganga o‘xshardi. “Liverpul” esa bu pullarga van Deyk va Alissonni xarid qildi.

“Barselona”da braziliyalikka joy topilmagani uchun u “Bavariya”ga ijaraga berib yuborildi. Chempionlar Ligasi chorak finalida o‘z jamoasi darvozasiga gol urganidan so‘ng “Barselona” uni ortga qaytarib, yana bir imkoniyat berishga qaror qildi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!