Озарбайжон Тоғли Қорабоғда жойлашган тарихий ва маданий арман ёдгорликлари сақлаб қолинишига кафолат беради. Бу ҳақда Озарбайжоннинг Россиядаги элчиси Пўлат Булбул ўғли маълум қилди, деб ёзмоқда «РБК».
«Мен ҳарбий эмасман ва у ерда ҳам эмасман, бироқ ўз даражамда кафолат беришим мумкинки, ҳеч қандай ёдгорликка, айниқса, маънавий ёдгорликка зарар етказилмайди», — дея маълум қилган элчи.
Дипломатнинг сўзларига кўра, Озарбайжон ёдгорликларга эҳтиёткорлик билан муносабатда бўлади, мамлакат ЮНЕСКО билан яқин ҳамкорлик қилади.
Эслатиб ўтамиз, 9 ноябрь куни кечқурун Арманистон, Озарбайжон ва Россия раҳбарлари тинчлик битимини имзолагани маълум бўлди. Унга мувофиқ, Арманистон Тоғли Қорабоғ ҳудудларининг катта қисмини ва 1990 йилдан бери Ереван тасарруфида қолган ҳудудларни Озарбайжонга топширади. Арманистон Қуролли кучлари ўз позицияларидан олиб чиқилмоқда, минтақага 2 мингта рус тинчликпарвари техника билан олиб келинмоқда. Арманистонга Қорабоғга транспорт йўлаги яратилиши кафолатланади, шу билан бир вақтда Озарбайжондан Нахичеван эксклавигача транспорт йўлаги яратилади.
Аввалроқ Озарбайжон президенти Илҳом Алиев унинг мамлакати Тоғли Қорабоғдаги урушда ғалаба қозонганини маълум қилганди. Шунингдек, Илҳом Алиевнинг таъкидлашича, Арманистон ушбу ҳудудни назорат қилган 30 йил ичида деярли барча фуқаролик иншоотлари бузилган. «Озод қилинган ерларнинг манзараси бу душман Озарбайжон халқига нисбатан нафрат билан яшаганлигини кўрсатди, акс ҳолда нима учун барча биноларни бузиш керак? Озод қилинган ҳудудларимизнинг деярли 99 фоизи вайрон қилинган — уйлар, мактаблар, касалхоналар, жамоат бинолари, тарихий ёдгорликлар, аждодларимиз қабрлари, масжидлар. Энди биз ушбу расмларни эълон қиламиз, уни матбуотда ҳар ким кўриши мумкин. Бу ваҳшийлик, бузғунчилик, бу ҳарбий жиноят», — деган Озарбайжон президенти.
Изоҳ (0)