Давлат харидлари порталида Сурхондарё вилояти давлат ҳокимияти ва бошқаруви органлари томонидан амалга оширилган қарийб 3 миллиард сўмлик давлат харидлари ҳақида маълумот берилган. Унга кўра, Сурхондарё вилояти давлат солиқ бошқармаси 349 миллион сўмга Equinox автомобилини харид қилган. Молия вазирлигининг маълум қилишича, уларнинг хати сохталаштирилган.
Давлат харидлари порталида жойлаштирилган ҳужжатларга кўра, Давлат солиқ бошқармасига ушбу русумдаги машинани сотиб олишга Молия вазирлиги рухсат берган.
Маълум бўлишича, Молия вазирлиги аслида Equinox олишга эмас, балки Nexia-3 автомобилини харид қилишга рухсат берган. Давлат харидлари порталига қалбакилаштирилган ҳужжат нусхаси жойлаштирилган.
«Молия вазирлиги томонидан ўтказилган хизмат суриштирувига асосан, ижтимоий тармоқларда жойлаштирилган хат, хусусан, Сурхондарё вилоят Ғазначилигига тақдим этилган Молия вазирлигининг юқорида қайд этилган 2020 йил 9 октябрдаги EC 8724-сонли хати ўзгартирилганлиги, яъни ‘Neksiya-3 русумли’ сўзлари қалбакилаштирилганлиги аниқланди», — дейилади вазирлик хабарида.
Таъкидланишича, ҳолат юзасидан Бош прокуратурага Молия вазирлигининг жавоб хатига ўзгартириш киритган мансабдор шахсларга нисбатан қонунчиликда белгиланган тартибда чоралар кўрилиши юзасидан ўрнатилган тартибда Молия вазирлигининг мурожаати йўлланган.
Давлат солиқ қўмитаси ҳам ушбу ҳолатга ўз муносабатини билдириб, хизмат текшируви бошланганини маълум қилган.
«Ушбу принцип асосида ҳолат юзасидан хизмат текшируви ўтказиш тўғрисида Давлат солиқ қўмитаси раисининг буйруғи қабул қилинди. Хизмат текшируви давомида аниқланган маълумотлар қўшимча равишда эълон қилинади», — дейилади хабарда.
Аввалроқ Ўзбекистонда янги ташкил этилган Пиллачилик қўмитаси 1,5 миллиард сўмга Chevrolet Tahoe, Malibu ва Lacetti, Маданият вазирлиги давлат харидлари доирасида иккита Chevrolet Malibu-2 автомобилини энг қиммат конфигурациясида сотиб олгани тўғрисида хабар берилганди.
Изоҳ (0)