Қашқадарёда 66 ёшли чол ва унинг кампири ваҳшийларча ўлдирилиб, ёқиб юборилган. Воқеа бўйича гумонланувчилар озодликда юрибди

Қашқадарё вилоятининг Миришкор туманида 66 ёшли чол ва унинг 62 ёшли кампири ўлдирилиб, ёқиб юборилди. Бу ҳақда «Дарё»га хабар берган марҳумларнинг ўғли ва келини жиноят ишида қариндошининг қўли борлигини айтмоқда.

«2020 йил 4 октябрь куни кечки пайт боламни эмизиб, ухлашга ётдик. Бироздан сўнг деразамизнинг тагидан югуриб ўтган кишининг оёқ товушлари эшитилди. Аввалига қайнотам бўлса керак деб ўйладим, сўнгра қайнотам кекса киши бўлса, қандай югуради деб ўйладим. Сўнг жим бўлди. Кейин ётдим. Соатини билмайман, бироздан сўнг яна эшигим тортилди. Ташқаридан ‘Шалола, Шалола’ деб чақиришди. Турмуш ўртоғим уйда йўқ эди. Чақирган одам эриммикин деб ‘Сизмисиз’ дедим. Индамади-да, эшикни тортди. Эшик очилиб кетди. Болам совқотмасин деб, эшикни ёпиш учун ўрнимдан турдим. Эшик олдидаги ‘одёл’ни кўтариб, эшикни ёпишга уринганимда кимдир бошимга муштлаб урди. Йиқилиб тушдим. Кейин ўрнимдан турганимда икки ёшли боламнинг қўлидан ушлаб, боши билан ерга ураётган экан. ‘Беш йил деганда фарзандли бўлдим. Боламни урманг, дедим. Хўп, унда сени урамиз, дея яна мени уриб кетди. Мени ураётган одамнинг кўзи ва қоши таниш бўлганидан кимлигини билиш учун юзидаги рўмолини тортдим. Кўрсам, ўзимизнинг Панжи тоғамиз экан», — дейди марҳумларнинг айни кунда шифохонада даволанаётган келини Шалола Жўраева.

Шалола Жўраеванинг аниқлик киритишича, у Панжи тоғамиз деб атаётган киши уларга қариндош бўлиб, қайнопасининг турмуш ўртоғи, яъни марҳумларнинг куёви бўлган.

Марҳумлар келинининг маълумот беришича, уни уйига кириб калтаклаган кишидан ташқари шериклари ҳам бўлган.

«Панжи тоға мени ураётган пайтда ташқаридан тўрт-беш кишининг овози эшитилди. Улар ‘Иброҳим келяпти’ дейишди. Шундан кейинги воқеаларни эслолмайман. Сабаби бошимни ёришган экан. Кўзимни очсам, шифохонада эканман», — дейди Шалола Жўраева.

Марҳум чол-кампирнинг ўғли, Шалола Жўраеванинг турмуш ўртоғи Иброҳим Пайғамбарқуловнинг маълумот беришича, у уйига қайтган пайтда хотини ва ўғли ҳушсиз бўлган. Ота-онаси эса ўлдирилган. Уйи ёқиб юборилган.

«Ўша куни кечки пайт соат 20:50 ларда уйга келдим. Машинамни ичкарига қўйиб, ‘гараж’нинг олдида хотинимни чақирдим. Кейин деразани тақиллатдим. Ҳеч ким гапирмагач уйга кирдим. Кирсам ўғлим ва хотиним ҳушсиз ётган экан. Хонада олов ёнаётган экан. Уларни ташқарига олиб чиқиб, отам ва онамнинг уйига қараб югурдим. Борсам онам эшик олдида хириллаб ётган экан. Отам эса ётоқ жойида йўқ экан. Хона ёнаётгани учун тутун ҳидига туриб бўлмасди. Хонадан чиқиб, амакимнинг уйига қараб югурдим», — дейди Иброҳим Пайғамбарқулов.

Марҳумлар ўғлининг айтишича, у вазиятдан хабар топгач қариндошлари ва қишлоқ шифокорига, шунингдек, ҳудуд профилактика инспекторига воқеа ҳақида хабар берган.

«Қариндошларга хабар бериб, уйга қайтган пайтимда уйнинг бир бурчагида қорни ёриб ташланган ва кўкрак қисми ёнаётган отамга кўзим тушди. Билсам отам ваҳшийларча ўлдирилиб, ёқиб юборилган экан», — дейди Иброҳим Пайғамбарқулов.

Иброҳим Пайғамбарқулов хотини шифохонада ўзига келгач бор воқеани унга гапириб берганини айтмоқда.

«Хотиним шифохонада ўзига келгач воқеа ҳақида сўрадим, — дейди Иброҳим Пайғамбарқулов. — Хотиним уни урган ва шу ишни қилган одам опамнинг турмуш ўртоғи Панжи эканлигини, унинг юзидаги рўмолини тортгач юзини аниқ кўрганини айтди.

Айтилишича, мазкур ишда гумонланувчи сифатида қамоққа олинган Панжи исмли шахс ва унинг шериклари ҳозирда қўйиб юборилган.

«Прокуратура Панжи ва унинг шерикларини дастлаб қамоққа олганди. Бироз ўтиб, қўйиб юборди. Хотиним унинг айбдор эканлигини айтиб турган бўлса-да, прокуратура бунга эътибор бермаяпти. Улар ИИБ ходимлари Панжи ва шерикларини уриб, айбни бўйнига қўйган бўлиши мумкин дейишибди. Прокуратура Панжининг оёқ кийимидан ота-онамнинг эмас, бошқа икки шахснинг қон изи чиққанини айтибди. Демак, яна битта очилмаган жиноят иши борми шунда?», — дейди Иброҳим Пайғамбарқулов.

«Дарё» мухбири билан суҳбатлашган Миришкор туман прокурори Акром Бобохоновнинг айтишича, ҳолат юзасидан Жиноят кодексининг 97-моддаси 2-қисми (Икки ёки ундан ортиқ шахсни қасддан ўлдириш) билан жиноят иши қўзғатилган. Ҳозирда тергов ҳаракатлари олиб борилмоқда.

Иброҳим Пайғамбарқулов ҳамда Шалола Жўраеванинг қўшимча қилишича, воқеадан бир ҳафта олдин хонадон куёви Панжи ва унинг қариндоши уларнинг уйига келган.

«Ўшанда отам поччам Панжининг амакиси Жонқулга ‘Сенинг ўн йил олдинги жиноятинг ҳақида хабар бериб, 20 йилга қаматаман’ деганди, — дейди марҳум чол-кампирнинг ўғли. — Кейин отамдан бу ҳақда сўрадим. Билсам Жонқул, поччам Панжи ва шериклари билан бундан тахминан 10 йил илгари Нурмаҳмат исмли ўғлини уриб, ўлдириб қўйган экан. Кейин эса жиноятини яшириш учун ўғлини осиб қўйган. Буни отам кўрган экан. Булар отам жиноят ҳақида хабар бериб қўймасин, деб онам иккисини ўлдирган», — дейди марҳум чоп-кампирнинг ўғли.

«Дарё» манбасининг маълумот беришича, ИИБ томонидан гумон қилинувчи сифатида қамоққа олинган шахслар «ИИБ да қийноққа солингани учун жиноятни бўйнига оляпти» деган тахмин билан қўйиб юборилган. 2020 йил 4 октябрь куни содир бўлган жиноят иши эса 11 ноябрга қадар ҳам очилмасдан қолмоқда. Жиноятчилар эса ҳамон очиқда юрибди.