Самарқанд вилоятидаги 25 фоиз электр энергияси истеъмолчилари 11 ноябрь соат 22:51 да электр энергиясиз қолган. «Самарқанд ҳудудий электр тармоқлари» корхонасидан маълум қилишларича, бунга Ўзбекистон ва Туркманистон энергия тизимларини боғлаб турган Л-511 линиясининг фавқулодда ўчиши сабаб бўлган.
Л-511 линиясининг фавқулодда ўчиши ортидан Ўзбекистон энерготизимида 740 мКВ электр энергияси танқислиги юзага келган, SAON автоматика тизими ишлаб кетган. Оқибатда Самарқанд вилоятида Л-Панжикент, Л-ПТФ, Л-Булунғур-1, Л-Булунғур-2, Анҳор, Хатирчи, Жума 110 киловатт линиялари, Дамариқ, Оқолтин, Меҳнат 35 киловаттли линиялари автоматик тарзда ўчирилган.
«Ҳудудий электр тармоқлари» компанияси матбуот хизматидан «Дарё»га маълум қилишларича, Самарқанд вилоятининг электрсиз қолган ҳудудларидаги таъминот 23:39 да Ўзбекистоннинг ўзидаги захира имкониятларини ишга солиш ҳисобига қайта тикланган. 12 ноябрь тонги ҳолатига кўра, вилоятдаги электр энергияси истеъмолчиларининг 8 фоизида чекловлар сақланиб қолмоқда.
Аввалроқ Энергетика вазирлиги 2020 йилда электр энергиясидаги узилишлар сони ва давомийлиги икки баравар камайгани ҳақида маълум қилганди.
Мавзуга доир:
- Ўзбекистон электр энергетика комплексига 457 миллион доллар йўналтирилади.
- «Энергия экспорти ҳажми импорт билан тенг. Биз импортчи мамлакатмиз дейишимиз нотўғри» – Энергетика вазири ўринбосари
- Андижонда чироқлари электрдан қарздорлик сабаб ўчириб қўйилган қоронғи трассадаги ЙТҲ оқибатида икки киши ҳалок бўлди
Изоҳ (0)