Осиё тараққиёт банки (ОТБ) Фарғона водийсидаги темир йўл тармоғини модернизация қилишни якунлаш учун 121 миллион доллар миқдорида кредитни маъқуллади. Бу минтақадаги иқтисодий ўсишни ривожлантиришга, савдо-сотиқ ва минтақавий алоқаларни яхшилашга ёрдам бериши кутилмоқда, дея хабар бермоқда банк веб-сайтига таяниб «Gazeta.uz».
Кредит Фарғона водийсидаги Поп, Наманган ва Андижон ўртасида 145,1 километр темир йўл алоқаларини электрлаштиришга ёрдам бериш учун ОТБ томонидан 2017 йилда тасдиқланган 80 миллион долларлик маблағни тўлдиради.
Қўшимча маблағлар юк ва йўловчи поездлари сонини кўпайтиришга, сигнализация ва телекоммуникация тизимидаги бўшлиқларни тўлдиришга, темир йўл ходимларининг поездларни бошқариш замонавий усулларидан фойдаланиш имкониятларини оширишга ёрдам беради.
Фарғона водийсидаги темир йўл тармоғининг модернизация қилиниши одамларнинг соғлиқни сақлаш, таълим олиш ва иш билан таъминланиш имкониятларини яхшилаши кутилмоқда. Шунингдек, бу Ўзбекистон ва қўшни давлатлар ўртасида туризм ва савдо-сотиқни ривожлантиришга ҳисса қўшади. Чунки ушбу темир йўл тармоғи Марказий Осиё минтақавий иқтисодий ҳамкорлик (CAREC) дастурининг 2-коридорига киради.
Хабарда айтилишича, темир йўллар COVID-19 пандемияси даврида энг ишончли юк ташиш шакли бўлган.
Изоҳ (0)