Ўзбекистонда 2021 йил 1 январдан бошлаб мактаб директорларини лавозимга тайинлаш ва лавозимдан озод қилиш ҳокимлар бошчилигидаги маҳаллий халқ депутатлари Кенгаши билан келишилган ҳолда амалга оширилади. Бу Президентнинг 6 ноябрдаги «Ўзбекистоннинг янги тараққиёт даврида таълим-тарбия ва илм-фан соҳаларини ривожлантириш чора-тадбирлари тўғрисида»ги фармонида белгиланган.
Фармонга кўра, бўш ўринларга ҳудудий халқ таълими бошқармалари томонидан кўрсатилган мактаб директорларининг номзодлари туман (шаҳар) кенгашлари томонидан танлов орқали танланади. Мактаб директори лавозимига номзодлар ушбу танловда ўзларининг мактаблари фаолиятини кейинги уч йил ичида юқори даражага кўтариш дастури билан қатнашади.
Кенгашлар танлов натижаларига кўра энг яхши уч йиллик дастурларнинг ишлаб чиқувчиларини танлайди ва тегишли лавозимларга тайинлаш учун ҳудудий халқ таълими бўлимларига топширади. Кенгаш томонидан танланган номзодлар умумтаълим мактаблари директорлари лавозимига ҳудудий халқ таълими бўлимлари томонидан тайинланади.
Йил охирида умумтаълим мактаблари директорлари кенгаш ва жамоатчилик вакиллари олдида уч йиллик дастурнинг бажарилиши тўғрисида ҳисобот беради, ушбу ҳисобот натижаларига кўра кенгаш директорларнинг фаолиятини баҳолайди.
Бундан ташқари, Қорақалпоғистон халқ таълими вазири, вилоятлар ва Тошкент шаҳар халқ таълими бошқармаларининг раҳбарлари, туманлар (шаҳарлар) халқ таълими бўлимлари мудирлари бир вақтнинг ўзида тегишли равишда Қорақалпоғистон Вазирлар Кенгаши раиси, вилоятлар, Тошкент шаҳар ҳокимлари, шунингдек, туманлар (шаҳарлар) ҳокимларининг таълим ва тарбия масалалари бўйича маслаҳатчи бўлади.
Аввалроқ Тошкент шаҳри, Тошкент вилояти, Нукус шаҳри ва вилоятлар марказларидаги навбатлилик коэффициенти 0,7 дан паст бўлган мактаблар 5 йилга ишончли бошқарувга берилиши, 90 фоиз битирувчиси ОТМга кирган мактаб директорлари пул мукофоти олиши ҳақида хабарлар берилганди.
Изоҳ (0)