Хитой компанияси орқа панелида 8 та камера жойлашган смартфонни патентлади

Хитой компанияси ҳар бурчагида иккитадан камерага эга смартфонни патентлади, деб хабар беради IXBT.

2020 йилнинг май охирларида Lens Technology (Changsha) Co. Ltd орқа панелида саккизта камера жойлашган смартфон патентига ариза берган эди. Патентга 2 октябрь куни рухсат берилган, шунингдек, у Жаҳон интеллектуал мулк ташкилоти маълумотлар базасига киритилган.

Патентда смартфон тўлиқ ҳошиясиз бўлиб, пастки қисмида тугма жойлашган. Тахминларга кўра, фронтал камера дисплей юзасидан ўрин олади.

Суратлардан кўриш мумкинки, орқа панелнинг ҳар бир бурчагида иккитадан камера ўрин олган. Қўшимча тўртта ёруғлик диод чақноқ ҳам жойлашган. Орқа панелнинг марказий юқори қисмида эса худди микрофонга ўхшаш нуқта мавжуд. Смартфон USB-C разёми ва корпуснинг чап томонида қўшимча тугмага эга.

Lens Technology компанияси Хунань провинциясининг пойтахти — Чанша шаҳрида жойлашган. Хитой трансмиллий компанияси асосан объективлар ва ҳимоя ойналарини яратиш ҳамда ишлаб чиқариш билан шуғулланади.

Аввалроқ Xiaomi компанияси смартфонлар учун 300 фоиз кўпроқ ёруғлик ва суриладиган объективга эга камерани намойиш этганди.