Xitoy kompaniyasi orqa panelida 8 ta kamera joylashgan smartfonni patentladi

Xitoy kompaniyasi har burchagida ikkitadan kameraga ega smartfonni patentladi, deb xabar beradi IXBT.

2020-yilning may oxirlarida Lens Technology (Changsha) Co. Ltd orqa panelida sakkizta kamera joylashgan smartfon patentiga ariza bergan edi. Patentga 2-oktabr kuni ruxsat berilgan, shuningdek, u Jahon intellektual mulk tashkiloti ma’lumotlar bazasiga kiritilgan.

Patentda smartfon to‘liq hoshiyasiz bo‘lib, pastki qismida tugma joylashgan. Taxminlarga ko‘ra, frontal kamera displey yuzasidan o‘rin oladi.

Suratlardan ko‘rish mumkinki, orqa panelning har bir burchagida ikkitadan kamera o‘rin olgan. Qo‘shimcha to‘rtta yorug‘lik diod chaqnoq ham joylashgan. Orqa panelning markaziy yuqori qismida esa xuddi mikrofonga o‘xshash nuqta mavjud. Smartfon USB-C razyomi va korpusning chap tomonida qo‘shimcha tugmaga ega.

Lens Technology kompaniyasi Xunan provinsiyasining poytaxti — Chansha shahrida joylashgan. Xitoy transmilliy kompaniyasi asosan obyektivlar va himoya oynalarini yaratish hamda ishlab chiqarish bilan shug‘ullanadi.

Avvalroq Xiaomi kompaniyasi smartfonlar uchun 300 foiz ko‘proq yorug‘lik va suriladigan obyektivga ega kamerani namoyish etgandi.