2021 йил 1 апрелдан бошлаб Ўзбекистон ҳудудида фақат микронутриентлар (витаминлар, минерал воситалари ва микроэлементлар) билан бойитилган олий навли унларнинг сотилишига рухсат берилади. Бу ҳақда Ўзбекистон Президентининг «Аҳолининг соғлом овқатланишини таъминлаш борасидаги қўшимча чора-тадбирлар тўғрисида»ги қарорида сўз боради, деб ёзади Spot.
Шу муносабат билан унни бойитиш учун четдан олиб кириладиган микронутриентларга ноль ставкали бож ўрнатилмоқда.
Бу нима сабабдан амалга оширилмоқда?
2019 йилда ишлаб чиқарилаётган ва барча навдаги импорт қилинаётган буғдой унининг 30 фоизигина микронутриентлар билан бойитилгани аниқланган эди.
Бу каби унни Ўзбекистон аҳолисининг 56 фоизга яқини истеъмол қилади. Организмда темир танқислиги анемиясининг (камқонлик) олдини олиш учун аҳолининг 90 фоизини қамраб олиш зарур. ЖССТ маълумотларга кўра, 70 фоиз кўрсаткич ҳам анемия даражасининг сезиларли даражада камайишига имкон беради.
Эслатиб ўтамиз, 2020 йилнинг 1 апрелидан Ўзбекистон ҳудудига фақат микронутриентлар билан бойитилган биринчи навли буғдой унини олиб кириш мумкин. Бундан ташқари, 2021 йил 1 январдан биринчи навли буғдой уни фақат микронутриентлар билан бойитилган ҳолда ишлаб чиқарилади ва сотилади.
Изоҳ (0)