«Нега айнан муқаддам судланганлар ишлаяпти?». Ниғматилла Йўлдошев пойтахт бозорлари бош назоратчисини сўроқ қилди

Бош прокуратурада 7 ноябрь куни ташкил этилган коррупция масалаларига оид идоралараро йиғилишда бош прокурор Ниғматилла Йўлдошев «Янгиобод ихтисослашган бозори» директори қатор коррупциявий жиноятларни содир этишда айбланганини маълум қилганди. Бош прокурор айни пайтда бозорларда таниш-билишчилик, турли суиистеъмолчилик ва талон-торожликлар авж олаётганини билдириб, «Таъбир жоиз бўлса, бу файзли масканлар коррупция ўчоғига айланиб бормоқда»,— деган.

Шунингдек, у ҳолатни изоҳлар экан, «Наҳотки бу ҳолатдан Тошкент шаҳар ҳокимлиги ва Муниципиал активларни бошқариш маркази раҳбари Музаффар Абдураҳмоновнинг хабари бўлмаса, ёки қайта қайта судланган, борган жойидан ўзига пул ўмаришни касб қилган бу шахсни яна раҳбарликка тайинлашдан у манфаатдорми? Исмоилов қамоққа олингандан сўнг унинг ўрнига ҳамтовоғи Йўлбарсов тайинланганлигига нима дейсиз?», — деб қўшимча қилган.

«Дарё» мухбири Миролим Исажоновнинг хабар беришича, мазкур тадбирнинг савол-жавоб қисмида Ўзбекистон бош прокурори Тошкент шаҳар ҳокимлиги ҳузуридаги коммунал активларни бошқариш маркази бош директори Музаффар Абдураҳмоновни онлайн тарзда сўроқ қилган.

Музаффар Абдураҳмонов: Барча эътирозларингиз ўринли. Ҳаммасидан хулоса қилдим. Кадрлар масаласини ҳам қайта кўриб чиқаман.

Ниғматилла Йўлдошев: Қачондан бери ишлайсиз бу лавозимда?

Музаффар Абдураҳмонов: Фаолиятим 2019 йил июль ойидан бошланган.

Ниғматилла Йўлдошев: Бу ҳолатларга нима дейсиз, қандай изоҳ берасиз?

Музаффар Абдураҳмонов: Бу соҳага янги кирганим учун уни тўлиқ ичигача ўрганмаган эканман. Бозор соҳасига келганимда бозор тушуми ойига ўртача 8-10 миллиард сўм даромад келтирарди. Биз ҳар бир бозордаги ижара ҳақи, автотураргоҳ ва бошқа масалаларни назоратга олиб, ойлик тушумларни 22 миллиард сўмгача, яъни 220 фоизга кўтардик. Масалан, Эски шаҳар деҳқон бозоридаги автотураргоҳни кўздан кечирганимизда...

Ниғматилла Йўлдошев: Ўзи умумий нечта бозорингиз бор?

Музаффар Абдураҳмонов: 20 та бозор савдо корпуслари мавжуд, шундан 12 таси деҳқон бозори, 8 та ихтисослаштирилган бозор.

Ниғматилла Йўлдошев: Шу бозорларнинг эгаси ўзи ким, у ерларда қариндош-уруғ, таниш-билишчилик йўқми, деб секин «география»дан бошлаб ўрганмайсизми? Кейин нега айнан бозордаги фаолиятида суиистеъмол ва талон-тарож қилиш ҳолати бўйича муқаддам судланганлар ишлаяпти? Шуларга бир аҳамият қаратилмадими? Нима учун жиноят иши қўзғатилганидан сўнг унинг (пойтахтдаги «Янгиобод ихтисослашган бозори» директори Исмоилов – таҳр.) ўрнига яна шуни ҳамтовоғи Йўлбарсов бошлиқ қилиб тайинланди?

Музаффар Абдураҳмонов: Унинг ҳамтовоғи эканлигини билмайман, муҳтарам Бош прокурор. Лекин Бош прокуратура департаменти томонидан «Тез битта ходим беринглар, имзо қўйиш ваколатига эга бўлсин», дейишгани сабабли унинг ўринбосарини вақтинчалик вазифа бажарувчи қилиб қўйганмиз.

Ниғматилла Йўлдошев: Ўзи хоҳлаган одамингизни ҳужжатини кўтарсангиз, унга тегишли бўлиб чиқарди, тўғрими?

Музаффар Абдураҳмонов: Мен узр сўрайман...

Ниғматилла Йўлдошев: Бозор директорларини сизнинг тақдимномангиз билан шаҳар ҳокими имзо қўйиб, тасдиқлайдими? Лавозимга тайинлаш қандай бўлади? Бизнинг тергов ҳали буни охирига етади. Ким тавсия этади лавозимга қўйишга?

Музаффар Абдураҳмонов: Ҳар бир бозор раҳбарининг кадрлар масаласини шаҳар ҳокими орқали ўтказамиз.

Ниғматилла Йўлдошев: Буйруқни сиз чиқарасизми?

Музаффар Абдураҳмонов: Буйруқни мен чиқараман. Аммо бизда кенгаш бор, ўша кенгаш раиси имзо қўяди.

Ниғматилла Йўлдошев: Майли энди қаранг, бир ўзи бошқа бозорда, иккинчи ўғли иккинчи бозорда, учинчи ўғли тўртинчи бозорда, яна бир жияни хавфсизлик бўйича бўладиган бўлса... Бу том маънодаги ҳақиқий бозор бўлиб қолибди-да унда?!

Музаффар Абдураҳмонов: Мен бу ҳақда яқинда жиноий иш очилганида билдим. «Фарҳод» деҳқон бозори ўринбосарини билмасдим. «Авиасозлар» деҳқон бозоридаги раҳбар ҳам унга тегишли одам эканлигини ҳозир билдим. Мен узр сўрайман.

Ниғматилла Йўлдошев: Тошкент шаҳар ҳокимининг ўринбосари борми, қаерда? Даврон ака сиз қандай тушунтириш берасиз?

Тошкент шаҳар ҳокимининг биринчи ўринбосари Даврон Ҳидоятов: Мен бу масала бўйича жавобгар эмасман. Лекин энди биз ҳар бир бозор раҳбари учун текширув ўтказамиз: у судланганми ёки йўқми? Шу пайтгача бу иш билан шуғулланганларни хатловдан ўтказиб, биз албатта ўрганамиз.

Ниғматилла Йўлдошев: Муҳтарам президентимизнинг бозорларга бўлган муносабатини сиз билан биз жуда яхши биламиз, тўғрими?

Даврон Ҳидоятов: Тўғри, тўғри.

Ниғматилла Йўлдошев: Шундай бир шароитда қилаётган ишимиз наҳот шундай талабларга жавоб беради, деб ўйлаймиз?! Ундан кўра аҳолига қулайлик яратиш мақсадида бозор даромадини ошириб, ўзимизнинг қадриятларга мос ва хос бозорларни яратсак бўлмайдими?

Даврон Ҳидоятов: Тўппа-тўғри айтяпсиз. Камчиликлар жуда кўп. Ҳозиргача анча иш қилинган. Лекин бу етарли эмас. Ҳақиқатан қайси бозор раҳбарининг ҳужжатини кўтарсак, ҳаммаси муқаддам судланган бўлиб чиқади...

Ниғматилла Йўлдошев: Ҳаммасидан ўзимиздан, инсофни биринчи ўзингга сўра дейдику. Ўзимиз шунга йўл қўйиб берамиз. Шунинг учун Даврон ака тегишли хулоса чиқариб... Бу киши (Музаффар Абдураҳмонов назарда тутиляпти – таҳр.) шаҳар ҳокими олдидан ўтади деяпти. Демак шаҳар ҳокимияти ичида ҳам бевосита бозорларга раҳбар танлаш, тайинлаш, жойига қўйиш масаласи билан шуғулланадиган ходим бўлса керак. Шуни ҳам масъулиятини кўриб чиқиш керак, жазо белгилашни ҳам кўриш лозим. Фақат жиноий жавобгарлик эмас, маъмурий, интизомий жавобгарлиги ҳам бор, тўғрими?

Даврон Ҳидоятов: Тўппа-тўғри, биз бу масалани ҳам кўтарамиз. Бу бўйича сизга алоҳида...

Ниғматилла Йўлдошев: Ҳокимингизга етказинг.