Наманганда МИБ туман бўлими бошлиғи ўринбосари 2 минг доллар пора билан қўлга тушди

Наманган вилоятида ДХХ ва прокуратура ходимлари томонидан тезкор тадбир ўтказилди, дея Бош прокуратурага таяниб «Kun.uz» хабар бермоқда.

Тадбир давомида Мажбурий ижро бюросининг туман бўлими бошлиғи ўринбосари маҳаллий тадбиркордан 2 минг АҚШ доллари олган вақтида ашёвий далиллар билан ушланди.

Маълум бўлишича, 2019 йил тадбиркорга қарашли МЧЖ фаолияти солиқ идоралари томонидан текширилиб, солиқ қарздорлиги аниқланган ва уни ундириш учун тўпланган ҳужжатлар МИБга юборилган.

МИБнинг туман бўлими бошлиғи ўринбосари эса 3 минг АҚШ доллари эвазига қарздорликни ёпишини айтиб, воситачи орқали тадбиркордан аввал 1000 АҚШ доллари ва 2,2 миллион сўм пулни олган.

Ҳолат юзасидан Жиноят кодексининг тегишли моддалари билан жиноят иши қўзғатилган.

Аввалроқ Самарқандда коллежга киритиб қўйиш эвазига фуқародан 400 доллар олаётган шахс, Бухорода ЙҲХБ ходимига 400 минг сўм пора бермоқчи бўлган ҳайдовчи ҳамда Бухоро вилояти Давлат санитария-эпидемиология назорати бошқармаси бошлиғи пора олаётганда қўлга олингани хабар берилганди.