Самарқанд вилоятининг Оқдарё туманидаги иккита қабристонда ёнғин содир бўлди. Бу ҳақда «Дарё»га маълум қилган мурожаатчилар таклифига кўра, таҳририят мухбири Фарҳод Норбўтаев воқеани ўрганиш учун айтилган манзилга борди.
Маълум бўлишича, ёнғин 2020 йил 3 ноябрь куни туманнинг Ойтамғали маҳалласидаги «Султон» ҳамда «Примкент» маҳалласидаги «Ўтарчи» қабристонида содир бўлган. Натижада 7 гектар ер майдонига эга бўлган иккала қабристоннинг катта қисми аланга ичида қолган.
2017 йилдан буён «Султон» қабристонида қоровул вазифасида ишлаб келаётган Наврўз Ўроқовнинг маълум қилишича, ёнғин қўшни қабристондан бошланган. Бу пайтда улар қабристонда ободонлаштириш ишларини олиб бораётган бўлган. У қабристоннинг бир гектардан ортиқ ер майдонининг ёнишига сабаб бўлган оловни ким ёққанлигини кўрмаган.
«Бизлар тушлик қилишга кетганимизда тўсатдан ёнғин келиб чиққан. Қўшни қабристоннинг қоровули қўнғироқ қилиб, қабристонда ёнғин бўлаётганини айтиб, мени чақирди. Учта ўғлим билан келиб, оловни ўчиришга уриндик, аммо ўчира олмадик. Ёнғин хавфсизлиги ходимларини чақирганимиз билан улар қабристонга кира олмайди. Қабрларнинг устидан юролмайди. Шунинг учун маҳалла раисига қўнғироқ қилдим. Олов қўшни қабристон томондан иккинчи томонга ўтиб келди. Оловни тўхтата олмаганимиз учун иккинчи қабристонга ҳам ўтди. Қабристон иккига бўлинган. Шамол бизнинг қабристон томонга эсаётгани учун олов аланга олиб, биз томонга ўтди», — дейди «Султон» қабристони қоровули Наврўз Ўроқов.
«Ўтарчи» қабристони қоровули Нормуҳаммад Солиевнинг айтишича, ёнғин 3 ноябрь куни соат тахминан 13:00 атрофида содир бўлган. Унинг тахмин қилишича, қўшни қишлоқда мол боқадиган ёш болалар ўйинқароқлик қилиб ёки картошка пишираман деб тасодифан ёқиб юборган бўлиши ҳам мумкин.
«Соат 12:30 атрофида мен тушлик қилиш учун уйга келдим. Уйга келганимда Иштихон туманидан ўғлим қўнғироқ қилиб, қабристондан тутун чиқаётганини айтди. Борсам ўн метр жойи ёнган экан. Ўчириб улгурмадим. Қўшни қабристон қоровулига ҳам қўнғироқ қилдим. У ҳам келди. Иккаламиз ҳам оловни ўчиришга улгурмадик. Ёнғин нима сабабдан келиб чиққанини билмайман. Бизлар янтоқни ўриб, чуқурга уйган эдик. Ёнғин бир-бир ярим соатлар давом этди. Ўчириш учун кўп ҳаракат қилдик. Аммо иложи бўлмади», — дейди Нормуҳаммад Солиев.
«Примкент» маҳалласи оқсоқоли Аслиддин Абдураҳимовнинг таъкидлашича, қабристоннинг бир гектар ери ёнган.
«Ҳақиқатан ҳам ачинарли ҳолат бўлган. Бу ерда кўп инсонлар ётибди. Бу бизнинг ҳам айбимиз. Борича тушунтириш ишлари олиб бориб, қоровулларни огоҳлантирдик. Ободонлаштириш ташкилотига хат билан чиқдик. Бу бўйича чора тадбирларни кўрамиз. Иложи борича ҳашар йўли билан тозалаймиз», — дейди «Примкент» маҳалласи оқсоқоли Аслиддин Абдураҳимов.
Оқдарё туман экология ва атроф муҳитни муҳофаза қилиш инспекцияси бошлиғи Жонибек Ўроқов қабристонга олов қўйган шахсни аниқлаш ва уни топиш мақсадида туман Ички ишлар бўлимига мурожаат қилганлигини билдирди.
«Икки кун аввал бизга туманимиздаги Ойтамғали қишлоғида қабристон ёниб кетганлиги ҳақида хабар келди. Ҳақиқатан келиб, ҳолатни ўргандик. Қабристон жуда катта. Иккита қишлоқнинг қабристони. Қоровули ҳам иккита. Туман ИИБга мурожаат қилганмиз. Улар қидирув ишларини олиб боришмоқда. Ҳозирги кунда иккита қоровул ҳам жаримага тортилган», — дейди Жонибек Ўроқов.
Самарқанд вилоят экология ва атроф-муҳитни муҳофаза қилиш бошқармаси ахборот хизматининг маълум қилишича, «Примкент» МФЙ ҳудудида жойлашган «Ўтарчи» қишлоқ қабристони фуқаролар С.Н. ва Ў.Н.нинг ҳудуддаги ўсимлик қолдиқларини ёқиб юбориши оқибатида келиб чиққан бўлиб, улар «Табиатни муҳофаза қилиш тўғрисида»ги қонуннинг 20-моддаси, «Atmosфера ҳавосини муҳофаза қилиш тўғрисида»ги қонуннинг 4-моддаси талабларини қўпол равишда бузган. Мазкур ҳолат юзасидан ҳуқуқбузарларга нисбатан Маъмурий жавобгарлик тўғрисидаги кодекснинг 88-моддаси 3-қисми (дала ва аҳоли пунктларида анғиз, хазон ва шох-шаббаларни ёки ўсимликларнинг бошқа қолдиқларини ёқиб юбориш орқали атмосфера ҳавосини зарарли моддалар билан ифлослантириш)га мувофиқ маъмурий баённома расмийлаштирилиб, жарима қўлланилган. Шунингдек, маҳалла оқсоқоллари иштирокида тушунтириш ишлари олиб борилиб, огоҳлантиришлар берилган.
Изоҳ (0)