Андижон вилоятида иккита юк машинаси ва учта енгил автомобиллар иштирокида содир бўлган йўл-транспорт ҳодисаси оқибатида бир йўловчи жароҳат олди. Бу ҳақда ИИВ ЙҲХББ ахборот хизмати хабар берди.
Маълумотларга кўра, 9 ноябрь куни соат 15:30 ларда Олтинкўл тумани «Қўштепа» МФЙ ҳудудидан ўтган А-373 Тошкент—Ўш автомобиль йўлининг 425-километрида 29 ёшли ҳайдовчи бошқарувидаги Isuzu ўзи билан бир йўналишда ҳаракатланиб келаётган Labo юк машинасини уриб юборган. ЙТҲ 51 ёшли Labo ҳайдовчиси машинани чап томонга бурмоқчи бўлгани сабаб юзага келгани айтилмоқда.
Тўқнашувдан сўнг Labo қарама-қарши йўналишга ўтиб кетиб, ўз йўналишида ҳаракатланиб келаётган иккита Nexia ва Damas енгил машиналари билан авария содир этган.
ЙТҲ натижасида Labo йўловчиси 1975 йилда туғилган Ж.Қ. тан жароҳати олиб, шифохонага ётқизилган. Мазкур ЙТҲ юзасидан Олтинкўл тумани ИИБ ҳузуридаги Тергов бўлими томонидан терговга қадар суриштирув ишлари олиб борилмоқда.
Маълумот ўрнида, Isuzu русумли юк автомобили ҳайдовчиси Ш.И. бир йил мобайнида бир маротаба қувиб ўтиш қоидаларини бузганлиги бўйича жаримага тортилган.
Аввалроқ Навоийда ёмғирли ҳаво сабаб юзага келган сирпанчиқ йўлда 11 та автомобиль иштирокида йўл-транспорт ҳодисаси содир бўлгани тўғрисида хабар берилганди. Унда MAN русумли юк автомашинаси ортилган юки билан кескин тормоз олиб, Lacetti’ни уриб ўтган ва сирпанишда давом этиб тиркамаси билан йўл четида тўхтаб турган «УАЗ», MAN юк машиналари, Mercedez-Benz, Cobalt, учта Nexia ва Matiz автомобилларига шикаст етказган.
Изоҳ (0)