Namangan viloyatida DXX va prokuratura xodimlari tomonidan tezkor tadbir o‘tkazildi, deya Bosh prokuraturaga tayanib “Kun.uz” xabar bermoqda.
Tadbir davomida Majburiy ijro byurosining tuman bo‘limi boshlig‘i o‘rinbosari mahalliy tadbirkordan 2 ming AQSh dollari olgan vaqtida ashyoviy dalillar bilan ushlandi.
Ma’lum bo‘lishicha, 2019-yil tadbirkorga qarashli MChJ faoliyati soliq idoralari tomonidan tekshirilib, soliq qarzdorligi aniqlangan va uni undirish uchun to‘plangan hujjatlar MIBga yuborilgan.
MIBning tuman bo‘limi boshlig‘i o‘rinbosari esa 3 ming AQSh dollari evaziga qarzdorlikni yopishini aytib, vositachi orqali tadbirkordan avval 1000 AQSh dollari va 2,2 million so‘m pulni olgan.
Holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan.
Avvalroq Samarqandda kollejga kiritib qo‘yish evaziga fuqarodan 400 dollar olayotgan shaxs, Buxoroda YHXB xodimiga 400 ming so‘m pora bermoqchi bo‘lgan haydovchi hamda Buxoro viloyati Davlat sanitariya-epidemiologiya nazorati boshqarmasi boshlig‘i pora olayotganda qo‘lga olingani xabar berilgandi.
Izoh (0)