Ўзбекистон аэропортларидаги Duty Free дўконлари хусусийлаштирилади. Компания карантин вақтида ҳам соф фойда олган

Ўзбекистондаги Duty Free дўконларини бошқарувчи «Central asia megastar» МЧЖ компанияси хусусийлаштириладиган компаниялар рўйхатига тушди. Бу ҳақда Давлат активларини бошқариш агентлиги маълумотларига таяниб, Spot хабар берди.

Ҳозирги пайтда компаниянинг 52,3 фоизли назорат пакети давлатга тегишли бўлиб, уни хусусий секторга сотиш режалаштирилмоқда. Агентлик маълумотларидан маълум бўлишича, 1995 йилда тузилган «Central asia megastar» МЧЖ рўйхатдаги барқарор соф фойда келтирадиган кам сонли компаниялардан бири ҳисобланади.

Duty Free 2018 йилда 74,2 миллиард сўм даромад, шундан 31,3 миллиард сўм соф фойда олган. 2019 йилда эса бу кўрсаткич мос равишда 87,4 миллиард ва 23,7 миллиард сўмни ташкил қилган.

Компания аэропортлар фақат чартер ва махсус рейсларни қабул қилган карантин вақтида ҳам ўз рентабеллигини сақлаб қолди. 2020 йилнинг учинчи чорагида компаниянинг даромади 23,7 миллиард сўмни, соф фойдаси эса 6,7 миллиард сўмни ташкил қилган.

Компания активларининг рентабеллиги ҳам ижобий кўрсаткичларни сақлаган — 0,23 фоиз. Ўтган икки йилда эса рентабеллик 0,61 фоиз ва 0,56 фоизга тенг бўлган. Компания капиталининг рентабеллиги 2020 йилда 7,9 фоизни ташкил этган бўлса, бу кўрсаткич 2018 йилда 37,2 фоиз, 2019 йилда эса 28,2 фоизга тенг бўлган.

2020 йилда компаниянинг қарзлари кескин — 7,1 миллиард сўмдан 16,8 миллиард сўмга ортган. Бошқа компанияларнинг Duty Free олдидаги қарзларида ҳам шундай ҳолат кузатилган. Қарзлар миқдори 491,9 миллион сўмдан 4,4 миллиард сўмга ошган.

Тошкент халқаро аэропортидаги биринчи Duty Free дўкони 1991 йилда очилган. 1995 йилда «Central asia megastar» МЧЖ тузилган. Компания сайтида айтилишича, Duty Free Тошкент, Самарқанд, Бухоро ва Урганч аэропортларида ишлайди.