Россиянинг Қозон шаҳридаги Ўзбекистон бош консулхонасининг маълумотига кўра, 2020 йил 7 ноябрь куни Самара вилояти Самара шаҳри Промишленности кўчаси 33-уй манзилида жойлашган шахсий уй ёниб кетган, дея хабар бермоқда Ташқи ишлар вазирлиги.
Ёнғин натижасида 5 нафар одам жароҳат олган, 4 киши вафот этган. Жароҳатланганлардан бири А.Х. Ўзбекистон фуқароси бўлиб, у Н.И.Пирогов номли 1-сон шаҳар клиник шифохонасига ётқизилган. Ташхис – ис газидан заҳарланиш, бошнинг юмшоқ тўқималари лат ейиши.
«Россия ҳуқуқни муҳофаза қилиш идоралари тергов ҳаракатларини олиб бормоқда. Бош консулхона вазиятни назоратга олди ҳамда ваколатли органлар ва тиббиёт муассасаси билан доимий алоқада бўлиб турибди», – дейилади вазирлик хабарида.
Россиянинг «Mir24.tv» нашри хабар беришича, ёнғинда вафот этганлардан иккитасининг шахси аниқлаштирилган. Унга кўра, уларнинг бири 1998 йилда, иккинчиси 2000 йилда туғилган йигитлар бўлган.
Дастлабки маълумотларга кўра, ёнғин электр симларининг носозлиги туфайли содир бўлган. Жароҳат олган 5 кишидан баъзилари ёниб кетган уйда вақтинча рўйхатдан ўтгани аниқланган. Бино эгасига нисбатан жиноят иши қўзғатилган.
Аввалроқ Ўзбекистоннинг Туркиядаги элчихонасида портлаш бўлиши ҳақида ёлғон хабар берган фуқаро аниқлангани, Россия Истанбулда одам ўлдиришда айбланаётган ўзбекистонликни Туркияга топширгани ҳамда Россиядаги ўзбек муҳожирининг 3 ёшли фарзанди 6-қаватдан қулаб тушиб, ҳалок бўлгани ҳақида хабар берилганди.
Изоҳ (0)