Коронавирусга қарши вакцина ҳақидаги янгиликлар сабабли АҚШ фонд биржаси рекорд даражадаги ўсиш билан очилди

АҚШ фонд биржалари индекси Pfizer компанияси томонидан яратилган COVID-19 касаллигига қарши вакцина ҳақидаги янгиликлардан сўнг рекорд даражадаги кунлик ўсишни қайд этди. Бу ҳақда Meduza хабар берди.

Акциялари АҚШ биржаларида савдо қилинадиган энг йирик 505 та компанияни ўз ичига олган S&P 500 индекси савдолар очилганидан 15 дақиқа ўтиб 3,6 фоизга ўсди.

АҚШнинг 30 та энг йирик компаниясини ўз ичига оладиган Dow Jones industrial average индекси эса 5,1 фоизга ўсган. Юқори технологияли компаниялар акциялари билан савдо қиладиган Nasdaq биржаси индекси эса 0,8 фоизга ўсган.

Business Insider нашрининг қайд этишича, дастлаб авиакомпаниялар ва молия соҳаси компаниялари акциялари қимматлаган. Netflix ва Zoom Video Communications компанияларининг акциялари эса аксинча пасайган.

Zoom компанияси акциялари вакцина ҳақидаги янгиликлар фонида 20 фоизга қадрсизланган, Netflix акциялари эса 4,6 фоизга арзонлашган. Шунингдек, видеоўйинлар яратувчи компаниялар акциялар ҳам арзонлашган.

АҚШнинг Pfizer фармацевтика компанияси 9 ноябрь куни Германиянинг BioNTech компанияси билан ҳамкорликда яратилган коронавирусга қарши вакцинанинг учинчи босқич синовларининг дастлабки якунлари ҳақида ҳисобот берди. Дастлабки маълумотларга кўра, вакцинанинг самарадорлиги 90 фоизни ташкил қилган.