Владимир Путин овоз бериш натижалари расман эълон қилингандан сўнг АҚШнинг сайланган президентини сайловлардаги ғалабаси билан табриклайди. Бу ҳақда Россия президентининг матбуот котиби Дмитрий Песков журналистларга берган интервьюсида айтиб ўтди, дея хабар бермоқда Meduza.
«Путин АҚШнинг сайланган президентини ғалаба билан табриклаши ҳақидаги саволингизни олдиндан билган ҳолда, мен қуйидагиларни айтмоқчиман: биз сайлов натижаларининг расмий эълон қилинишини кутиш тўғри деб биламиз», – дейди Песков.
Нега Владимир Путин якуний натижаларни кутмасдан, тўрт йил аввал Дональд Трампни ғалабаси билан табриклаганлиги ҳақидаги саволга Кремль вакили қуйидагича жавоб берди.
«Фарқи яққол кўриниб турибди. Ҳозирда амалдаги президент томонидан эълон қилинган муайян ҳуқуқий процедуралар бор. Шу сабабли расмий эълонни кутишни тўғри деб биламиз», – дейди президентнинг матбуот котиби.
Аввалроқ АҚШ оммавий ахборот воситалари, хусусан, Associated Press, CNN, The New York Times, ABC News, Fox News ва бошқалар 7 ноябрь, шанба куни Жо Байденни АҚШнинг сайланган президенти деб эълон қилди. ОАВ ҳисоб-китобларига кўра, президентликка номзод – Демократик партиядан кўрсатилган собиқ вице-президент Жо Байден Пенсильвания штатида ғалаба қозонган ва президент сайловида ғолиб чиқиш учун танловчиларнинг камида 270 та овози керак бўлган ҳолатда 273 та овозни қўлга киритган.
АҚШнинг амалдаги президенти Дональд Трамп Американинг йирик оммавий ахборот воситалари Жо Байденнинг сайловларда ғолиб чиққанлигини эълон қилганидан кейин ҳозирча мағлубиятини тан олишдан бош тортди.
Шунга қарамай, Байден аллақачон давлатнинг янги раҳбари сифатида халққа мурожаат қилди. Кўплаб мамлакатларнинг раҳбарлари уни аллақачон АҚШ президенти этиб сайлангани билан табриклади.
Изоҳ (0)