Грузия пойтахти Тбилисида полиция норозилик намойиши иштирокчиларини тарқатиш учун кўзни ёшлантирувчи газ ва сув замбаракларини қўллади. Бу ҳақда «Sputnik Грузия» ва «РИА Новости» агентликлари хабар берган, деб ёзади «РБК».
Намойишчилар фикрича, мамлакатда бўлиб ўтган парламент сайловлари қалбакилаштирилган, шу сабабли улар янги сайлов ўтказилишини талаб қилмоқда.
Махсус воситалар қўлланилгани ҳақида Мтавари Аркҳи телеканали ҳам хабар берди. Унга кўра, сув замбараклари ва кўзни ёшлантирувчи газ огоҳлантиришсиз қўлланилган.
Кейинроқ ИИВ газ ишлатилганини рад этди. Вазир ўринбосари Кахабер Сабанадзе бу хабарларни дезинформация деб атади.
«ТАСС» ўз мухбирига таяниб ёзишича, митингни тарқатиб юбориш чоғида бир неча киши жабрланган, уларга тиббий ёрдам берилмоқда.
Дастлаб намойишчилар Грузия парламенти биноси яқинига тўпланди. Уларнинг қаршисида мухолифат партиялари аъзолари нутқ сўзлади. «Европа Грузияси» партияси етакчиларидан бири Элене Хоштария намойиш иштирокчилари талабларини эълон қилди: янги парламент сайловларини ўтказиш, Марказий сайлов комиссияси раиси Тамар Жваниянинг истеъфоси, сиёсий маҳбусларни озод этиш.
Шундан сўнг намойишчилар МСК биносига қараб йўл олди, у ерда муддатсиз иш ташлаш уюштирмоқчи бўлди.
Грузия ИИВ эълон қилган баёнотда намойишчилар МСК биносига бостириб киришга урингани ҳақида айтилади. «Кун охирида Марказий сайлов комиссияси қаршисидаги митинг чоғида намойишчилар бинога бостириб киришга уринди, бу видеоёзувлардан кўриниб турибди, бу хатти-ҳаракатлар полиция томонидан тақиқланган. Намойишчилар зўравонлик усулларини қўллагани ва полиция кўрсатмаларига риоя қилмагани учун, Ички ишлар вазирлиги қонун томонидан берилган ваколатлари доирасида пропорсионал куч қўллади», — дейилади муассаса хабарида.
Грузияда норозилик акциялари бир неча кундан буён давом этмоқда. 6 ноябрь, жума куни Грузия ОАВлари митинг ўтказилаётган жойларда отишма овозлари эшитилганини хабар қилган эди. Грузиянинг «Биринчи канали» гилзалар топилганини маълум қилиб, улар сигнал қуролиники деб тахмин қилганди.
Эслатиб ўтамиз, Грузияда парламент сайловлари 31 октябрь куни бўлиб ўтди. «Грузия орзуси — демократик Грузия» ҳукмрон партияси ғолибликка эришди, ҳукмрон партия 48 фоиздан ортиқроқ овоз тўплаган. «Ягона миллий ҳаракат» мухолифат партияси эса 27 фоизга яқин овоз тўплаган. «Европача Грузия — озодлик учун ҳаракат» ва «Ватанпарварлар альянси» партиялари 3 фоиздан кўпроқ овоз тўплашга муваффақ бўлган. Тўққизта партия эса 1 фоизли кўрсаткичдан ўтган.
Грузия мухолифати сайловларни сохталаштирилган деб ҳисобламоқда. Мухолифат партиялар етакчилари халқаро кузатувчилардан парламент сайловларини қонуний дея тан олмасликни сўраш нияти.
1 ноябрь куни Тбилиси марказидаги парламент биноси қаршисида мухолифатнинг норозилик намойиши бўлиб ўтган. Уларнинг етакчилари парламент норозиликлари ва 8 ноябрь куни кенг кўламли акция ўтказишни маълум қилиб, эркин шароитда янги сайловлар ўтказиш талабини қўйган.
Изоҳ (0)