AQSh prezidenti saylovlarida g‘alaba uchun zarur miqdordagi ovozlarni qo‘lga kiritgan Demokratlar partiyasidan nomzod Jo Bayden yanvarda lavozimiga kirishganidan keyin koronavirus pandemiyasi tufayli kelib chiqqan inqirozga duch keladi. Bu haqda Financial Times sog‘liqni saqlash sohasidagi ekspertlarga tayanib xabar bermoqda, deb yozadi “RBK”. Ularning ogohlantirishicha, mamlakatda COVID-19’ga chalinish holatlari soni keskin o‘sib ketadi.
Bayden koronavirus infeksiyasiga qarshi kurash uning ma’muriyatining birlamchi vazifasiga aylanishini va’da qilgan edi. 9-noyabr kuni u ekspertlar guruhini yig‘ishi, ular esa tegishli rejani ishlab chiqishni boshlashi kutilmoqda. Shunga qaramay, ekspertlar fikricha, Bayden “potensial halokatli vaziyatni meros qilib oladi”, bu kasallanganlar va shifokorlarning maslahatlariga quloq solmaydigan aholi sonining keskin o‘sishi holatidir.
“Jo Bayden va butun mamlakat yaqin haftalar va oylarda ulkan muammo bilan to‘qnash keladi… Mamlakatning ko‘plab hududlarida virus nazoratdan chiqishga ulgurdi, bu esa uning yanada tarqalib ketishi uchun juda qulay sharoit”, — dedi kasalliklar nazorati va profilaktikasi markazlarining sobiq rahbari Tom Friden.
Kolumbiya universiteti virusologi Anjela Rasmussen qayd etishicha, amerikaliklar so‘nggi to‘rt oy mobaynida COVID-19 tufayli doimiy manipulyatsiyani his qilgan, endi esa fuqarolarni hukumat ularni aldamayotganiga ishontirish uchun “juda qattiq harakat qilish kerak bo‘ladi”.
7-noyabr kuni Amerikaning eng yirik OAVlari tomonidan prezidentlik poygasining g‘olibi deb e’lon qilinganidan keyin so‘zlagan nutqida Bayden uning COVID-19’ga qarshi kurash rejasi “ilmiy asosga ega bo‘lishi”ni aytgan edi. Avvalroq esa u prezident etib saylansa, butun mamlakat hududida majburiy niqob taqish rejimini joriy qilishga va’da bergan edi. Bu rejalarni demokratlardan nomzodning saylovoldi shtabi vakili tasdiqladi. Uning so‘zlariga ko‘ra, Bayden tez orada gubernatorlarga va yirik shaharlar merlariga qo‘ng‘iroq qilib, ularni niqob taqishni majburiy qilishga ko‘ndirishni boshlaydi.
Avvalroq Jo Bayden prezidentlik lavozimiga kirishgandan so‘ng Donald Trampning bir qator farmonlarini bekor qilishni rejalashtirayotgani xabar berilgan edi.
AQSh ommaviy axborot vositalari, xususan, Associated Press, CNN, The New York Times, ABC News, Fox News va boshqalar 7-noyabr, shanba kuni Jo Baydenni AQShning saylangan prezidenti deb e’lon qildi. OAV hisob-kitoblariga ko‘ra, prezidentlikka nomzod – Demokratik partiyadan ko‘rsatilgan sobiq vitse-prezident Jo Bayden Pensilvaniya shtatida g‘alaba qozongan va prezident saylovida g‘olib chiqish uchun tanlovchilarning kamida 270 ta ovozi kerak bo‘lgan holatda 273 ta ovozni qo‘lga kiritgan.
AQShning amaldagi prezidenti Donald Tramp Amerikaning yirik ommaviy axborot vositalari Jo Baydenning saylovlarda g‘olib chiqqanligini e’lon qilganidan keyin hozircha mag‘lubiyatini tan olishdan bosh tortdi.
Tanlovchilar hay’ati prezidentni rasman 14-dekabr kuni saylaydi.
Izoh (0)