Qozog‘istonda bir necha kundan buyon COVID-19 bilan kasallanish holatlari ortmoqda, deb xabar beradi Tengrinews. Sog‘liqni saqlash vazirligi Jamoat sog‘lig‘ini saqlash milliy markazi direktori o‘rinbosari Baurjon Jusupov koronavirusning ikkinchi to‘lqini qanday bo‘lishi va aholida kasallikka qarshi immunitet shakllangan yoki yo‘qligi to‘g‘risida ma’lumot bergan.
Jusupovning so‘zlariga ko‘ra, “ikkinchi to‘lqin” degan atamaning aniq ta’rifi yo‘q.
“Koronavirus infeksiyasiga chalinish holatlarining ortayotgani haqida gapirishim mumkin. Ayni vaqtda rostan ham COVID-19’ga chalinayotganlar ortayotganini kuzatyapmiz. Aftidan, bu ikkinchi to‘lqinga aylanadi. Uning asosiy farqi — ikkinchi to‘lqin birinchisiga qaraganda uzoqroq davom etadi”, — deydi u.
Shuningdek, ekspert koronavirusga chalinish holatlari birinchidan ko‘proq bo‘lishi mumkinligi haqidagi savollarga javob qaytargan.
“Birinchi to‘lqinning eng yuqori nuqtasida koronavirusga chalinish holatlari yetarlicha yuqori bo‘ldi, hatto kuniga bir necha mingdan oshdi. Biroq kasallikka chalinganlarning real soni ro‘yxatga olingan raqamlardan ancha yuqori. Hozir ma’lum muddat qayd etilayotganlar soni yozdagidan ko‘ra yuqori bo‘ladi, ammo kasallikka chalinganlarning haqiqiy ko‘rsatkichi kamayadi”, — deydi Jusupov.
Bundan tashqari, u 2020-yilda gripp sabab yuzaga kelgan o‘tkir respiratorli virusli infeksiyalarga chalinish holatlari kamayadi. Shu bilan birga, ta’kidlanishicha, hozirda ko‘plab qozog‘istonliklarda koronavirusga qarshi immunitet shakllangan. Faqat uning qanchalik samarador ekanligi — hozircha noma’lum.
Eslatib o‘tamiz, Qozog‘iston poytaxti Nur-Sultonda aholi orasida COVID-19 kasalligi tarqalishi ortib borayotganligi tufayli 14-oktabrdan boshlab yangi cheklov va karantin choralari joriy etilgan. 4-noyabr kuni esa G‘arbiy Qozog‘iston viloyatida koronavirus bilan takroran kasallanish bo‘yicha birinchi holat qayd etilgan.
Izoh (0)