Дембеле, Гризманн, Коутиньо ва бошқалар. «Барселона»дан сургун қилинган Бартомеунинг трансфер хатолари ҳақида

Ўтган ҳафтада «Барселона» президенти Хосеп Бартомеу расман истеъфога чиқди. Ҳозирда эса клуб ва Лионель Месси ўз вазифасини яхшироқ бажара оладиган янги раҳбарни кутмоқда.

Ҳаддан ташқари кўп хатоларга йўл қўядиган (айниқса, трансфер ишларида) Бартомеунинг кетиши нафақат Месси ва унинг шериклари, балки мухлисларни ҳам бирдек хушнуд этгани бор гап. Шундай экан, уларнинг эътиборига Бартомеунинг қимматга тушган хатоларини ҳавола этишнинг айни вақти. Демак, қуйида сарфланган пулларни умуман оқлай олма(ёт)ган футболчилар ҳақида фикр юритилади.

Жереми Матье – 20 миллион евро

«Барса» ўша ёзда Марк-Андре тер Штеген ва Луис Суарес билан шартнома имзолаганини ҳисобга олинса, кўпчилик Жереми Матье ҳақида унутиб қўйганди, аммо ҳимоячи кимсан Карлес Пуйоль ва Эрик Абидалнинг ўрнини эгаллаши керак эди.

Тўғри, жамоанинг ашаддий мухлислари унинг «Эль-Класико»даги голини яхши эслаши мумкин (боиси мухлислар бундай ўйинларда урилган голларни унутмайди), бироқ франциялик футболчи бошқа ҳеч нарсаси билан ёдда қолмади. Охир-оқибат, у шунчаки «Барселона»ни эркин агент сифатида тарк этди.

Люка Дин – 16,5 миллион евро

Люка Дин ғоя бўйича Хорди Альба билан рақобатлашиши керак эди, бироқ у икки мавсумда бор-йўғи 46- арта майдонга тушди. Бу вақт ичида эса Альбани рақобатда енгиш имконсиз иш эди. Скаутлар адашгани ва футболчида потенциал йўқлиги кўриниб турарди.

Бироқ энг алам қиладиган жойи, трансфер ўзини оқламагани эмас, балки футболчининг ҳозирга келиб, «Эвертон»да кучли футболчига айланаётганидир. У 2018 йилда 18 миллион фунт эвазига каталон клубини тарк этган.

Томас Вермален – 18 миллион евро

Абадий жароҳатга мойил футболчи Томас Вермален «Арсенал»даги бешта муваффақиятли мавсумдан сўнг «Барса»га ўтганди. Унинг жамоада асосий марказий ҳимоячи бўлиши кутилганди, бироқ мунтазам жароҳатлар унга сира тинчлик бермасди.

Ўзининг каталон клубидаги биринчи мавсумида бельгиялик майдонга бир марта тушди, бу ҳам шартнома имзолаганидан бир йил ўтиб амалга ошганди. Натижада, у асосий таркибга кира олмади, ҳозирга келиб, Вермален Япониянинг «Виссел Кобе» клуби шарафини ҳимоя қилмоқда.

Андре Гомеш – 35 миллион евро

Дин билан бир вақтда имзоланган Андре Гомеш мухлисларда катта умид уйғотганди. Ярим ҳимоячи «Валенсия»да шу қадар яхши ҳаракат қилардики, ҳеч ким Бартомеунинг у учун 35 миллион ажратганига қаршилик қилмаганди.

Дастлаб Гомеш талаб қилинган ўйинни кўрсатди, аммо кейинчалик у умуман самарали ҳаракат қилмай қўйди ва мавсум охирига келиб Ла Лигадаги энг ёмон трансфер деб топилди. Натижада у ҳам «Эвертон»га сотиб юборилди.

Мартин Брэйтуэйт – 18 миллион евро

Брэйтуэйтнинг трансфери энг ёмони эмас, балки Бартомеу даврини очиб ташлаган битим бўлиб хизмат қилди. Усмон Дембеленинг жароҳатидан сўнг (у ҳақида кейинроқ) «Барселона»га трансфер ойнаси ёпилгандан сўнг ҳам ҳужумчи сотиб олишга рухсат берилди. Шу тариқа Мартин Брэйтуэйт Каталонияда пайдо бўлиб қолди.

«Леганес» эса «Барселона»нинг товон пули миқдоридан ҳайратда эди. Брэйтуэйт «Барса»да 11 учрашув ўтказиб, 1 та гол урди, етакчисиз қолган «Леганес» эса Сегундага тушиб кетди.

 Малком – 41 миллион евро

Даставвал Малком «Рома» билан келишувга эришганди, ҳатто римлик мухлислар уни кутиб олиш учун аэропортга ҳам йиғилганди. Бироқ сўнгги паллада «Барселона» бразилияликни «бўрилар»дан «тортиб» олади. Рим клуби эса бу ҳаракатни жиноят деб атайди. Бироқ бу ерда бошқа муаммо бор эди: «Барселона»нинг ўша пайтдаги мураббийи Эрнесто Вальверде Малкомга унчалик қизиқмаганди. Вальверде ҳатто клуб уни сотиб олмоқчи эканлигини ҳам билмаган.

Натижада, Малком 15 та ўйин ўтказиб, шундан сўнг «Зенит» сафига йўл олди.

Антуан Гризманн – 120 миллион евро

Франциялик футболчининг ҳали ўз истеъдодини исботлаш учун вақт бор, аммо унинг биринчи мавсуми тўлалигича муваффақиятсиз ўтди. «Сосьедад» ва «Атлетико» собиқ ўйинчиси жамоанинг ўйин услубига умуман тўғри келмаяпти. Антуан «Атлетико»да ҳар доим ҳужумчи бўлган, аммо 4-3-3 схемасида у ўзини худди бегоналардек ҳис қилмоқда.

Усмон Дембеле – 105 миллион евро

Усмон Дембеле «Барселона»га ўтганидан кейин тарихдаги иккинчи энг қиммат ўйинчига айланганди ва у ерда Неймарнинг ўрнини эгаллаши керак эди.

Аммо Дембеле ўзининг дебютидаёқ жароҳат олиб, тўрт ойга сафдан чиқади. Афсуски, бу фақат бошланиш эди. Иккинчи мавсумда француз бир қанча ўйинлар ўтказди, аммо барибир унга барқарорлик етишмасди. «Биллур оёқ» соҳиби деб ном олган Дембеле кетма-кет жароҳат олишда давом этаверди. Сўнгги хабарларга кўра, жамоа қишда у билан хайрлашиш ниятида.

Арда Туран – 34 миллион евро

2015 йилда «Барселона»га трансфер тақиқи қўйилганди, шу боис ёзда харид қилинган Арда Туран январгача майдонга туша олмасди. Бироқ узоқ кутилган имкониятдан туркиялик футболчи фойдалана олмади.

Мухлислар Туранни унинг майдондаги ҳаракатлари туфайли эмас, балки клубнинг кўплаб туркиялик ҳомийларини хурсанд қилиш учун имзоланган деб ҳисоблашди.

Вальверде жамоа билан ишлай бошлагач, Туран унинг режаларига киритилмаганлигини аниқ қилиб айтди. Шунингдек, журналист ва мухлислар ҳам уни тинч қўймади. Охир-оқибат, Арда 2018 йилда Каталония томонлардан бош олиб кетди: дастлаб «Истанбул», кейинчалик эса «Галатасарой»га кўчиб ўтди.

Филиппе Коутиньо – 120  миллион евро

Агар Дембеле Неймарнинг ўрнини боса олмаган бўлса, балки Коутиньо бунинг уддасидан чиқар? Шу мақсадда Коутиньо 120 миллион евро эвазига «Ливерпуль»дан харид қилинди. Бироқ «қизиллар» собиқ юлдузи Каталонияга келиши билан футбол ўйнашни том маънода унутиб қўйганга ўхшарди. «Ливерпуль» эса бу пулларга ван Дейк ва Алиссонни харид қилди.

«Барселона»да бразилияликка жой топилмагани учун у «Бавария»га ижарага бериб юборилди. Чемпионлар Лигаси чорак финалида ўз жамоаси дарвозасига гол урганидан сўнг «Барселона» уни ортга қайтариб, яна бир имконият беришга қарор қилди.